Is not too late to stop supporting these wild animals ..Sabti, 01 Jannaayo, 2011 (HOL) − Ciidammo kawada tirsan dowladda Soomaaliya ayaa maanta ku dagaalamay meel ku dhow Madaxtooyada, waxayna iska dileen laba askari, afar kalena way iska dhaawaceen sida uu sarkaal ka tirsan dowladda Soomaaliya u sheegay saxaafadda.
Dagaalka, askarta ayaa yimid markii ciidammo ka carooday mushaar la'aan ay xireen jidka gala madaxtooyada iyo xarunta golaha shacabka oo baarlamaanka fariisinka u ah, waxaana dagaalka uu yimid markii ay halkaas gaareen ciidamo kasoo horjeeda gadoodka askarta kale.
Khasaaraha dagaalka, ayaa ku ekaa ciidammada dagaalamay, waxaana dagaalka ku guuleystay inay joojiyaan saraakiil dowlada ka tirsan, iyadoo ay xaaladdu kusoo laabatay caadi.
Ciidammada gadoodka sameeyay, ayaa la sheegay inay iska waayeen liiska askarta dowladda ee mushaaraadka la siinayay maanta iyo shalay, taasoo keentay inay xiraan jidadka gala xarumaha dowladda, gaar ahaan madaxtooyada.
Madaxda DKMG ah, ayaan ka hadlin gadoodka cidamada, wuxuuna imaanayaa iyadoo ay shalay, xalay iyo maanta ay ka socdaan Muqdisho dagaallo u dhexeeya dowladda iyo Xarrakatul Shabaab, kuwaasoo labada dhinac ay khasaare kasoo gaartay.
Dowlada Soomaaliya, oo ka talisa qaybo yar oo Muqdisho ka tirsan, ayaa bilihii ugu dambeeyay waday qorshayaal ay dib ugu habeynayso ciidamada, iyadoo tirada ciidamada lagu sheegay inay yihiin kuwo aan si rasmi ah loo ogeyn.
Ciidamada maanta gadoodka sameeyay, ayaa noqonaya kuwii ugu horreeyay oo sameeya gadood noocan oo kale, waxaana socda dadaalo lagu doonayo in lagu xaliyo arintan, sida ay sheegeen saraakiil dowlada ka tirsan.
Maxamed Xaaji Xuseen, Hiiraan Online
