Shirkadda Isgaarsiinta Golis Telcom Soomaaliya ayaa maanta[Khamiis] dhagax dhigtay dhisme cusub oo ay yeelaneyso Shirkadda kaas oo laga dhisayo gudaha magaalada Bosaso ee xarunta ganacsiga Puntland.
Munaasabad ka dhacday xarunta shirakdda oo lagu kala saxiixanayey heshiiska dhismaha shirkadda ayaa waxaa kasoo qaybgalay mas’uuliyiin ay kamid yihiin
Maareeyaha guud ee Shirkadda Golis Telcom Aaden Sheekhdoon,Wasiirka Wasaaradda Warfaafinta.Isgaarsiinta,Hidaha iyo dhaqanka Axmed Cali Askar,Guddoomiyaha gobolka Bari Sheikh Cabdixaafid Cali Yuusf,Injineer Cabdiqaadir Ciise Cumar iyo marti sharaf kale.
Shirkadda Golis Telcom oo ah mida loo dhisaayo dhismaha iyo Shirkadda qaabilsan dhismaha ee Mubaarak Construction ayaa kala saxiixday heshiis qoraal ah oo ku saabsan dhismaha Shirkadda.
Saxiixa ka dib ayaa Shirkadda Isgaarsiinta Golis Telcom ay soo qabanqaabisay qado sharaf lagu maamusayo Xafladda dhagax-dhiga Golis Telcom Soomaaliya kaas oo lagu qabtay Hotel Panorama ee magaalada Bosaso
Maareeyaha Shirkadda dhismaha Mubaarak Construction Injineer Cabdiqaadir Ciise Xaaji Cumar ayaa sharaxaad ka bixiyey dhismaha ay u dhisayaan Shirkadda Golis Telcom Soomaaliya.
Injineer Cabdiqaadir Ciise Xaaji Cumar ayaa sheegay in dhismaha cusub uu ka kooban yahay 7-dabaq kaas oo mustaqbal la gaarsiin karo 10-dabaq .
Injineer-ka ayaa sidoo kale sheegay in dhismaha cusub oo ay yeelaneyso Shirkadda Golis Telcom Soomaaliya uu leeyahay adeegyada kala ah:
1. Dab damis
2. Monitoring and Surveillance.
3. Elevator.
4. Escalator.
5. Wiishash lagu kala gudbi karo[Sensor doors].
6. Qaboojiye la xakameyn karo[AC/Split duct].
7. Muraayadaha Xabadaha celiya[Reinforced glass-1st Floor].
8. Xakameynta Xasharaadka[No Insects].
9. Sumadda Shirkadda Golis Telcom oo ka muuqaneysa Kor[Brand Name].
Maareeyaha guud ee Shirkadda Golis Telcom Aaden Sheikhdoon ayaa sheegay in dhismaha cusub ee Shirkadda Golis Telcom uu tilmaam u yahay kobaca iyo horumarka Shirkadda,wuxuuna sheegay in loo baahanyahay in ganacsatadu ay maalgeshi ku sameystaan gudaha dalka.
Aaden Sheikhdoon ayaa ku tilmaamay dhismaha cusub in uu yahay kuwa ka dhisan Caalamka kan maanta ay Shirkaddu ay dhagax-dhigtayna uu yahay dhismihii ugu horeyey ee laga hirgeliyo gudaha dalka Soomaaliya.
Khudbada maareeyaha oo dhinacyo badan taabaneysay ayuu sidoo kale kaga hadlay in uu soo bandhigay adeegyo cusub oo la magac baxay”KUMEE” kaas oo macmiilku usoo saaraya xiliga uu dansanyahay cida soo wacday iyo adeeg kale oo isna la magac baxay”WAA I KAN” oo sheegaya xiliga uu hawada dib ugu soo noqdo macmiilku.
Wasiirka Wasaaradda Warfaafinta.Isgaarsiinta,Hidaha iyo dhaqanka Dawladda Puntland Axmed Cali Askar oo kamid ahaa mas’uulkii dhagax-dhigay dhismaha cusub ee Shirkadda Golis Telcom Soomaaliya ayaa ku amaanay in Golis ay tahay hooyada Isgaarsiinta Soomaaliya loogana baahanyahay in si horumariso waxqabadkeeda.
Mas’uuliyiinta kala ah Guddoomiyaha gobolka Bari Sheikh Cabdixaafid Cali Yuusf,Guddoomiyaha rugta hanacsiga Puntland Maxamuud Xayir Ibraahim,Kuxigeenka duqa degmada Bosaso Cabdiqaadir Yuusuf Daahir,Ganacsade ,Maxamuud Faarax Bile oo ka hadlay xaflada ay dhamaantood ku amaaneen kaalinta Shirkaddu ku leedahay bulshada dhexdeeda.
Si kastaba ha ahaatee dhismaha cusub ee maanta ay dhagax-dhigtay Shirkadda Isgaarsiinta Golis Telcom uu noqonayaa dhismihii ugu horeeyey oo noociisa ah oo laga hirgeliyo Soomaaliya
