CEERIGAABO(OODWEYNENEWS)- Guud ahaan manta oo ay ugu dnbaysey maalmihii loo cayimay isusoobaxyada dhammaan axsaabta qaranka Somaliland ee ku waajahan ololaha doorashadan madaxtooyada Somaliland ee labada casho keli ahi ka hadhsan tahay ayaa waxa nasiib u yeeshay taageerayaalka xisbiga Ucid oo isugu soo baxay dhammaan fagaarayaalka gobollada Somaliland islamarkaasna guddoomiyaha xisbiga Ucid Eng-Feysal Cali Waraabe gobol kastaba isagoo wata diyaarad khaas ah uu taageerayaalkiisa kala qayb galay isusoo baxoodan ugu danbeeyey kalana hadlay fagaarayaashooda. Taasi oo ay qayb ka tahay duullimaadkiisii ugu horreeyey oo Feysal Cali Waraabe iyo weftigiisu subaxnimadii saaka (arbaca) kazoo degeen garoonka diyaaraduhu ka hadaan ee magaala-madaxda gobolka Sanaag Ceerigaabo
Guddoomiyaha Ucid Feysal Cali Waraabe iyo weftigiisa oo ay goobtaas diyaar ugu ahaayeen guddoomiyaha Ucid gobolka Sanaag C/laahi Axmed Daammur xubno sar-sare oo xisbigan ah iyo weliba taageerayaal badan ayaa islamarkiiba waxa madaarka looga soo hor kacay dhinaca fagaaraha beerta xorriyadda ee Ceerigaabo oo ay buuxiyeen taageerayaalka Ucid ee kasokow maalintooda ugu danbaysey haddana si weyn ugu sii diyaar garoobey guddoomiyahooda booqashada gaaban ugu yimid
agaarahan beerta xorriyadda Ceerigaabo oo markii Eng-Feysal iyo weftigiisu kusoo xeroodeen sawaxanka iyo sacabka taageerayaalkiisu kusoo dhowaynayeen meel fog laga maqlayey ayaa waxa mikroofoonka guddoomiyiisa ahna murashaxa madaxweynennimo ee xisbigan Ucid kusoo dhoweeyey guddoomiyaha xisbigan ee gobolka Sanaag C/laahi Axmed Daammur waxana hadalladiisii ka mid ahaa
“Madaxweyne kusoo dhowow magaala-madaxda gobolka Sanaag iyo fagaarahan taageerayaalkaagu isugu soo bexeen ee bacadka iyo dabaysha adiga dartaa u taagnaayeen”.
“Walaalayaal aad iyo aad ayaan idiinkaga mahad celinayaa sida weyn ee aad halkan isugu soo baxdeen una muujiseen taageeradiinna xisbiga Ucid”. Sidaas waxa hadalkiisa ku bilaabay guddoomiyaha xisbiga Ucid ahna murashaxa madaxweynaha Eng-Feysal Cali Waraabe. Isagoo hadalkiisa sii watana wuxu yidhi “Walaalayaal waxa nasiib wanaag ah in manta aannu halkan idiinku nimaadno iyadoo aannu idiinku nimid in aad ogaataan haddii aannu xukunka ku guulaysanno in aad ogaataan gobolka Sanaag in aanu go’doon noqon doonin”. Isagoo hadalkiisa sii watana wuxu yidhi “Walaalayaal doorashadan haddii aynu ku guulaysanno waxannu dhisi doonnaa xukuumad kooban oo aan ka badnayn 16 wasiir waxannuna dalka ku xukumi doonnaa shareecadda islaamka qabiilka iyo qolo-qoladana waa layska dhaafayaa”. Isagoo dhinaca axsaabta kale ay tartamayaan ka hadlayana wuxu yidhi “Walaalayaal axsaabta kale ee innala tartamaysa Udub dalka waxba uma qaban hantidii ummaddana way lunsadeen Kulmiyen waa Bahala-galeen”. Hadalkaas oo taageerayaalkii tirade badnaa si weyn ugu sacab tumeen. Ugu danbayn Eng-Feysal wuxu intaas kusii daray “Walaalayaal dardaarankeennu waa 26-ka June iyo codkiinna oo Ucid aad siisaan si aynu xukunka manta jira meesha uga tuurno oo isbeddel uga samayno Somaliland”.
Intaas kaddib Eng-Feysal Cali Waraabe iyo weftigiisa oo mar kale ay sii gelbiyeen Guddoomiyaha Ucid gobolka Sanaag C/laahi Axmed Daammur iyo mas’uuliyiin kale oo xisbigan ka tirsani ayaa waxay dib uga duuleen gegida diyaaradaha magaalada Ceerigaabo. Waxana taageerayaalka faraha badan ee isu soo baxay iyagoo lug iyo gaadiidba adeegsanaya kusoo wareegeen suuqyada waaweyn ee magaalada Ceerigaabo. Iyadoo guud ahaan jawiga isusoo baxan ugu danbeeyey ee taageerayaalka Ucid ka sameeyeen magaalada Ceerigaabo uu kusoo gebageboobey jawi xasilloon iyo nabadgelyo.
Dhinaca kalena isla galabnimadii ayaa kooxo ka tirsan Aqoonyahanka ku dhaqan gobolka Sanaag oo Shir ballaadhan ku qabtay Xarunta Mahuraan ee magaalada Ceerigaabo waxay iyaguna halkaas kazoo saareen baaq ballaadhan oo ku saabsan taageerada iyo in ay codkooda siin doonaan Xisbiga Ucid ee uu gudddoomiyaha iyo murashaxa madaxweynaha ka yahay Eng-Feysal Cali Waraabe.
OODWEYNENEWS.COM
CEERIGAABO
