Warsaxaafadeed Horumar laga sameeyay Beled Xaawo,

[grandpakhalif]

Mogadishu, 28 October 2010) Ciidanka Dowladda Soomaaliya iyo xooggaga Ahlu-Sunna Wal-Jamaca (ASWJ) ee deegaanka ayaa si guul leh u fashiliyay weerarro ay kooxaha xagjirka ah ku soo qaadeen degmada B/xaawo si ay u carqaladeeyaan ammaanka. In ka badan 20 ayaa laga dilay kooxda Al-Shabab toddobaadkan kaddib markii ay isku dayeen inay dib u qabsadaan degmadaas.

Tan iyo markii ciidanka dowladdu dib ula wareegeen magaalada bartamihii bishan, waxay billaabeen barnaamijyo ay bulshada kaga qeybgelinayeen howlaha maamulka, dibna ugu soo celinayeen nidaamkii iyo kala-dambeyntii. Nasiibdarro, madaafiic ay kooxaha xag-jirka ah ku garaaceen magaalada ayaa sababay khasaaro soo gaaray shacabka iyo barakac baahsan.

Sidoo kale, ciidanka dowladda ayaa horumar wanaagsan ka sameynayay gobollada Bakool iyo Hiiraan, halkaasoo ay jab ugu geysteen kooxaha dowladnimo-diidka ah. Dhammaan dadaalladani waxay ku jiheysan yihiin in la soo afmeero falalka waxashnimada ah ee ay ku kacayaan kooxahan xagjirka ah.

Wasiirka Warfaafinta Soomaaliya, Cabdiraxman Cumar Cusman (Eng. Yarisoow), ayaa yiri:

“Xukuumadda Soomaaliya waxay ammaaneysaa dadaallada ciidamada dowladda iyo kuwa ASWJ ee kooxaha xagjirka ah looga cirib-tirayo gobolladan muhiimka ah. Isku-xirnaan noocan oo kale ah waa muhiim xilliga la joogo si loo gaaro hadafka naga dhexeeya oo ah Soomaaliya oo nabad iyo barwaaqo ah.”

Dhinaca kale, Dolwaddu waxay si xooggan u cambaareyneysaa toogashadii ay kooxda Al-Shabab meel fagaare ah ku toogatay laba gabdhood magaalada B/weyne. Haweeney habaryar u ah mid ka mid ah gabdhahaas ayaa Radiyo Muqdisho u sheegtay in gabadha ay habaryarta u tahay ay ku sii jeedday Boosaaso si ay dalka u tahriibto.

Labadaasi gabdhood looma oggolaan xaqa ay u leeyihiin inay helaan garyaqaan u dooda, waalidkoodna lalama socodsiin falkan.

“Dilkan wuxuu mar kale na tusinayaa xad-gudubyada xuquuqda aadanaha ee ay galayaan kooxahan dambiileyaasha ah. Falka ay sameeyeen ee ah in la toogto dad carruur ah oo aan dambi gelin wax marmarsiinyo ah loogama helayo diinta islaamka iyo bani’aadannimada.”

Dhammaad
Wasaaradda Warfaafinta, Muqdisho

Ahmed Aadam Gacal

Muqdisho-Gedo-News