Siyaasada Somaliya ayaa tobankii sanno ee ugu dambaysay ahayd mid la iska dhaxlo, la isku daydo, isla markaana la iskaga masayro. 1996 markii uu geeriyooday Jan. Max'ed Farax Caydid waxa jagadiisii loo caleemo saaray wiilkiisa Xuseen Caydid oo markaas ka yimid dalka Maraykanka, iyadoo aan loo fiirin qibradiisa siyaasadeed iyo awoodiisa hogaamineed. Intaas wixii ka dambeeyay waxaa bilowday loolan iyo tartan u dhexeeyay wiilasha ay dhaleen odayaashii siyaasada Somaliya soo maray ama markaas ku jiray. Waxa saaxada siyaasada isla markiiba soo galay Ina Max'ed Sh. Cismaan, Ina Darmaan iyo ilmo hebel hebel...
Siyaasadii Somaliya waxay noqotay in wiil walba uu damco in aabihiis uu mar ka hor wareego si uu ula tartamo ilma hebel hebel. Odayaashii siyaasada ku jiray oo ilmahooda u dirsaday Yurub waxay bilaabeen inay soo dhawaystaan wiilashooda oo gacan yarayaal ka dhigtaan si marka ay dhintaan ay ula wareegaan kuraastooda bar-kuma-taalka ah. Waxa dalka dib ugu soo noqday oo aabayaashooda gacanyarayal u noqday Ina Cismaan Caato, Ina Cabdi Qaybdid, Ina Qanyare Ina C/lahi Yusuf iyo ilma hebel hebel oo dhan. Halkaasna waxa ku dayacmay siyaasadii Somaliya oo isku badashay tartan u dhexeeya ilmo hebel hebel. Waxa ugu dambeeyay oo shalay kusoo biiray ilmo hebel hebel wiil 24 jir ah oo uu dhalay Ibraahim Shaawey oo ku xigeen u ahaa duqa Magaalada Muqdisho una geeriyooday dhaawac kasoo gaaray qarax lala beegsaday gaari uu saarnaa. Ina Shaaweey ayaa shalay si rasmi ah loogu caleemo saaray kursigii aabihiis waxana xafladii caleema saarkiisa kasoo qayb galay duqa magalada Muqdisho Max'ed-Dheere oo uu ku xigeen u yahay hada wixi ka dambeeya. Waxan sugnaaba waa ilmo hebel hebel oo dhaxla aabayaashood marka ay geeriyoodaan.
