Dagaal Culus Oo Muddo-dheer Dad Iyo Daanyeer Ku Dhex Maray Buuraha Shaylaha Ee Duleedka Magaalada Borama
“60 Rag ah iyo 3000 oo Daanyeer ayaa 15 Saac ku dagaalamayay Buuraha Shaylaha”.
Borama (Oodweynenews)- Dagaal socday intii u dhaxaysay 4tii Galabnimo ee shalay ilaa 5 tii Subaxnimo ee Saaka isla markaana u dhaxeeyey dadka degaanka Camuud iyo Daanyeero tiro badan oo raxan raxan u degan buuraha ayaa shalay ka dhacay buuraha Shaylaha oo dhinaca Bariga wax aan ka badnayn 10km kaga beegan Magaalada Borama.
Md.Cabdi Aleele Mixile oo isagu ka mid ahaa Abaanduulayaashii weerarka shalay ku qaaday daanyeerka ayaa Lughayanews uga waramay sida ay wax u dhaceen waxana uu yidhi “Waxa aan ahayn 60 Rag ah oo iskugu jira Dhalinyaro iyo Waayeel kuwaasi oo ku hubaynaa Warmo, Ulo iyo Wadhaf, waxana weerarka qaadnay 4tii galabnimo, 15 saac ka dib waa nalaga awood batay,
Daanyeerkiina dib ayuu noo soo jabiyay waxana uu gabi ahaanta nagala wareegay Buuraha Shaylaha, waxa uu ahaa dagaal xoogan waxa uu dhinaca hore soo mariyay Nooca loo yaqaan Coonfaadhka oo dagaalka aad ugu fir fircoon, xoog iyo quwad badanina ay ka muuqato oo isku soo maqiiqayay meesha uu wadhafka iyo warankuba ka soo dhacayaan”.Abaanduule Mixile oo sida ay shalay wax u dhaceen ka sokow ka waramayay inta uu leegyahay khasaaraha uu soo gaadhay Ciidankiisa ayaa yidhi “Khasaaraha dhinayaga soo gaadhay waa Rag uu ku dhacay Wadhaf dhinayaga ka yimiday, Raga qaarna Buurta ayay ka shalwadeen markii nala soo jabiyay.
Abaanduule Mixile oo ka waramayay inta uu dhanaa Daayeerka ay shalay weererka ku qaadeen ayaa waxa uu yidhi “Haddii aanu ka badnayn kama yara 3000 oo Daanyeer”.
Degaanka Buuraha Shaylaha iyo degaanada kale ee ku hareeraysan ayaa ah kuwo uu daanyeerku aad ugu Tarmay waxana ay dadka degaanku sheegayaan inay ku qabaan dhib aad u furo badan oo ay ka mid tahay isagoo Daanyeerku Cuna xoolaha kaligood daaqa ah, sidoo kalena waxa uu faqaa Dalaga beeraha, Caruurta iyo dadka Waayeelka ah qaarkooda kali kalida u socdana wuu laayaa waxa kale oo jirta in Daayeerkii Tuugo joogto ah ka sameeyo guryaha degaanka isagoo ka cunaya Cuntada iyo Caanaha labadaba, dhibaatadan isbiirsatay ayaa nagu kalifay inaan weerar ku qaadno Daayeerka si aan uga xoreyno degaanka ayuu yidhi Abaanduule Mixile.
Waxa kale oo uu Md.Cabdi Alaale Mixile uu sheegay in arrinta dhibaatada Daanyeerkan ay hore ugu war galiyeen Maamulka degaanka balse aan ilaa hada helin cid wax ka qabatay.
Arrintii shalay dhacday iyo Khasaaraha uu gaystay Daanyeerkani shantii sano ee u dambaysay ayaa waxa ay noqonayaan kuwii ugu badnaa ee Muddo 40 sanadood ah ka dhaca degaankan oo uu Daanyeer gaysto.
Sida uu sheegay Abaanduule Cabdi Alaale Mixile (Maanta ayaa noo qorshaysan inaan dib isku urursano isla markaana qaadno weerar ka xoog badan kii shalay si aan Daanyeerka degaanka buuraha Shaylaha uga sifayno”.
Lughayanews-Borama
Btw, this is the type of Monkeys its actually a baboon
