Xukuumada Somaliland oo Sheegtay in Cid kastoo Xasuuq gaysat

[MrPrestige]

Xukuumada Somaliland oo Sheegtay in Cid kastoo Xasuuq gaysatay aan laga hadhi doonin


Wasiirka warfaafinta Somaliland Md. Axmed Xaaji Daahir Cilmi, ayaa ka hadlay war uu khamiistii Wargeyska Geeska Afrika, baahiyay oo sheegayay inuu Sheekh Shariif Gen. Maxamed Cali Samatar ka difaaci doono, dacwadda kaga socota dalka Maraykanka ee la xidhiidha xasuuqii uu u gaystay shacabka Somaliland.

Ilo xogogaala oo ku sugan dalka Maraykanka, ayaa wargeyska u sheegay in kulanka Samatar iyo Sheekh Shariif oo ka dhacay magaalada Menneopolis ee dalka Maraykanka ay si mug leh ugaga wada hadleen dacwadda ku socota. Haddaba, Wasirka warfaafinta Somaliland Md. Axmed Xaaji Daahir, ayaa warsaxaafadeed uu xalay soo saaray, waxa uu Sheekh Shariif iyo cid kastaba uga digay inay isku dayaan carqaladaynta dacwadaas, waxaanu warsaxaafadeedku u qornaa sidan: “Waxa jirta dacwad la xidhiidha tacaddiyadii iyo xasuuqii ka dhacay Somaliland oo lagu soo oogay Maxamed Cali Samatar oo ahaa Madaxweyne-xigeenkii iyo Wasiirkii Gaashaandhiga eeTaliskii Siyaad Barre , taasoo haatan hortaala Maxkamadku taala dalka Maraykanka oo lafilayo in dhawan ay bilowdo dhagaysiga dacwadiisa. Dacwadan oo ah mid caalami ah ayaa waxa mar kastoo la damco in la dhaqaajiyo soo baxa madax ka mid ah Maamulka Somaliya oo u tafaxayta sidii ay dacwadaasi u horjoogsan lahaayeen , iyagoo adeegsanaya magaca xukuumada Somalia.

Haddaba, xukuumada iyo bulshada reer Somalilandba meel kasta ha joogaane’e waxa ka go’an wakhti kasta oo ay qaadato inaan laga hadhayn cid kasta oo lug ku lahayd xasuuqii loo geystay dadka reer Somaliland sanadihii siddeetameeyadii gaar ahaan Maxamed Cali Samatar, oo ahaa Masuulkii sida tooska ah ugu caddeeyay BBC-da inuu isagu ahaa Janaraalkii amarka ku bixiyay in lagu duqeeyo diyaarad iyo madaafiic Magaalada Hargeysa, iyadoo uu shacbiguna ku dhex jiro.

Waxa kale oo aanu xasuusinaynaa Raga u halgamaya inay hor joogsadaan dacwada Maxamed Cali Samatar iyo kuwa kale ee la midka ahba inay yihiin kuwo lid ku ah xuquuqda bini’aadmiga iyo Xeerarka kale ee caalamiga ahba, sidaas awgeed aanay ku guulaysan doonin si kasta oo ay iskugu dayaan inay ku duudsiyaan xaqa ay u leeyihiin dhibaneyaashu inay daba galaan kuwii ku tacadiyay xuquuqdooda.

War-saxaafadeedkani wuxuu si gaar ah ugu dhiirigelinayaa ururada xuquuqul insaanka ee dacwadan gacanta ku haya inaanay marnaba ka daalin in mar uun Caddaalada horgeeyaan eedeysaneyaasha uu Maxamed Cali Samatar kow ka yahay, si looga jaro dambiyadii ay galeen.”


Source: www.geeska.net, Wargeyska Geeska Afrika, Hargeysa