Hargeysa: Xisbiga caddaalada iyo daryeelka ee UCID, ayaa galabta xaflad ballaadhan oo soo dhawayn ah ku qaabilay Beesha Muusa dheriya oo ka mid ah beelaha laga tirada badan yahay ee Somaliland, oo daboolka ka qaaday inay taageeradoodii iyo codkoodiiba ku biirinayaan xisbiga UCID.
Xafladaas oo lagu qabtay Hotel KAAH ee magaalada Hargeysa, ayaa waxa ka soo qayb-galay masuuliyiin sare oo ka tirsan xisbiga UCID oo ay ka mid ahaayeen Gudoomiyaha ololaha doorashada ee xisbiga Saleebaan Daahir Dogox, Xildhibaan Ibraahim Mahdi Buubaa, Gudoomiyaha Ololaha doorashada ee Gobolka Maroodi-jeex Mr Jiir, Suldaanka Beesha Muusa dheriyo Suldaan Naasir, odoyaasha, aqoonyahanka, Haweenka iyo dhaliyarada beesha taageeradooda ku soo biiray xisbigab UCID ee Muusa dheriyo.
Suldaan Naasir Suldaan Cabdi Ismaaciil oo halkaas ka hadlay, ayaa beeshiisa si weyn ugu hambalyeeyey go’aanka ay ku doorteen inay taageeradooda ku biiriyaan xisbiga UCID, “Aniga inaan KULMIYE, UDUB iyo UCID mid-na ahayn cid waliba way og tahay. Laakiin waxa halkan i keenay inaan ka qayb-galo oo aan ka muuqdo bulshadayda dadkii hormuudka u ahaa halka ay sahankooda fureen, ilaahay Guri barwaaqo haka yeelee oo ah xisbiga UCID.” Ayuu yidhi Suldaan Naasir.
Waxa xusay inay beeshiisu xor u tahay xisbiga ay teegeerayaan oo ah xisbiga UCID, oo ku tilmaamay xisbi imika-dan ka warhaya oo gacan ka gaysta horumarita waxbarashada Jaamacda ee Ardayda beesha Muusa Dheriyo, isaga oo tilmaamay in Gudoomiyaha xisbigu oo Araday Jaamacada dhigata qarashka ka bixiyo.
Waxa uu u soo jeediyey Bulshada reer Somaliland oo uu yidhi “Waxa aan leeyahay bulshada reer Somaliland, walaaloyaal aynu dalkeena wada ilaashano. Cadawguna wuu fara badan yahay maanta, waxaana aad la socotaan marxaladan aynu marayno siyaabaha nabadgelyada wax loo yeeli karaa way fara badan tahay, ee meel ha looga soo wada-jeedo ilaalinteeda iyo adkaynteeda-ba.”
Gudoomiyaha ololaha doorashada ee xisbiga UCID Saleebaan Daahir Dogox, oo isna xafladaas ka hadlay ayaa si weyn ugu mahad-celiyey beesha Muusa dheriyo ee taageeradooda ku xoojiyey xisbiga UCID, isaga oo u ballan-qaaday inay xisbi ahaan muhiimad gaar ah siin doonaan beesha Muusa dheriya haddii ay ku guulaystaan talada dalka.
Waxaana hadaladiisii ka mid ahaa oo uu yidhi “Walaaloyaal dib-u-dhaca beesha ku yimi waxaa ka masuul ahaa dawladihii ina soo maray, waa dawladihii dadka kala qayb-qabiyey ee qabiil-qabiilka inaga dhigay. Haddii aynu heli lahayn dawlad caddaalad ku dhisan waxa aynu la mid noqon lahayn dawladaha caalamka, waxaa halkaa ina dhigay waa caddaalad la’aan, waa dhaqan la’aan.”
Waxa uu intaas raaciyey oo uu yidhi “Waxa aanu idinka ballan-qaadaynaa marka uu doorashada ku guulaysto xisbiga UCID ee kursiga ay ku fadhsiistaan Eng. Faysal Cali Waraabe iyo Dr. Maxamed Rashiid in dadku sinnaadaan.”
Xildhibaan Ibraahim Mahdi Buubaa oo ah gudoomiye xigeenka Ololaha doorashada ee xisbiga UCID oo isna halkaa ka hadlay, ayaa tilmaamay inay tahay wax lagu farxo tallaabadan ay muujisay Beesha Muusa dheriya, isaga oo arrintaa ka hadlayana waxa uu yidhi “Waxa aan jeclahay in aan u mahad-naqo beesha iskeed isu soo abaabushay. Xafladan qiimaha badan ee aad arkaysaan ma aha mid xisbigu qaban-qaabiyey, oo xisbiga caado uma ah inuu beelaha dhaq-dhaqaajiyo oo uu Odoyaala lacag siiyo oo uu shirar u qabto sida ay xisbiyada kale ku kacaan. Waxa aan halkan ka cadaynayaa in shirkani yahay xaflad ay soo abaabuleen Beesha Muusha dheriyo, oo iyagu kharashka iska bixiyeen uguna talo-galeen inay mowqifkooda siyaasadeed ku caddeeyaan.”
Waxa kale oo Xildhibaan Buubaa deedafeeyey hadal si khaldan loo turjumay oo uu maanta daabacay Wargeyska madaxa banaan ee Jamhuuriya, kaasoo wargeysku sheegay in Xisbiga UCID uu Maxkamad soo taagi doono adaxweyne Daahir Rayaale Kaahinhadii uu Xisbigu Talada dalka ku guulaysto, isaga oo tilmaamay in arrintaas haba-yaraatee aanay wax-ba ka jirin.
Sida oo kale waxa uu xisbiga UDUB ku eedeeyey inay si badheedha oo khalad ahah inay u jareen boodhadh weyn oo ay ku sawirnaayeen musharixiinta xisbiga UCID, oo ku yaalay xaafalada Jig-jiga yare e Hargeysa, isla markaana inay ku bedeleen mid ay ku sawiran yihiin musharixiinta xisbiga KULMIYE.
Waxaa iyaguna halkaas ka hadlay Fawsi Maxamuud Cali oo ah Gudoomiyaha beesha Muusa dheriyo, Dr. Cabdi Xuseen oo ka mid ah Aqoonyahanka Beesha, Qushe Cali Afyare, Oday Daahir Faarax Khayre iyo Mulki Daahir Khayre oo dhamaantood ka tirsan beesha Muus dheriya, oo sheegay inay muddo ka baaraan-degayeen xisbigii ay taageeradooda siin lahaayeen, isla markaana shirar badan oo wada-tashiyo ah ka dib ay go’aansadeen inay taageero buuxda siiyaan xisbiga Caddaalada iyo Daryeel ee UCID, oo ku sifeeyeen inuu yahay xisbi ka saari karaya dhibaatooyinka kala duwan ee haysta.
Oodweynenews.com/Hargeya Office
