S/land vice president visits berbera to open new Termininal

[The_Emperior5]

M/Weyne Xigeenka Somaliland Oo Xadhiga Ka JarayDhiseyaal Laga Hirgeliyay Berbera
October 27th, 2010 Comments Off

Hargeysa (Somaliland.org)- Wefti uu hogaaminayo Madaxweyne ku xigeenka Somaliland Mudane Cabdiraxmaan Cabdillaahi Ismaaciil (Saylici) ayaa maanta socdaal ku tagay magaalada xeebta ku taalla ee Berbera,halkaasi oo uu xadhiga kaga jaray dhismeyaal iyo waddooyin sadexdii bilood ee la soo dhaafay ka hirgalay magaaladaasi.

Weftigan ayaa waxa si wayn u soo dhaweeyay madaxda iyo maamulka gobolka iyo degmada Berbera oo ay horkacayeen Badhsaabka gobolka Saaxil Maxamuud Cali Saleebaan iyo Maayarka degmada Berbera Cabdalle Maxamed Cali, waxaana weftigaasi loo gelbiyay dhinaca guriga martida ee magaalada Berbera.

Madaxwayne ku xigeenku waxa uu xadhiga ka jaray Terminaallo cusub oo ay wasaaradda duulista hawadu ka fulisay madaarka magaalada Berbera.waxa kale oo uu xadhigana ka jaray ilaa shan goobood oo ka tirsan dekeda magaalada Berbera, goobahaasi oo ay ka mid yihiin wadada halbawlaha ah ee gasha dekeda oo dib u habayn lagu sameeyay , xafiisyo loogu talo galay hawl fududaynta adeegyada ay dekedu bulshada u hayso, kaagag ay maraakiibtu biyaha ka qaataan inta ay dekeda ku xidhan yihiin, dhismayaal dhinaca gargaarka degdega ah iyo weliba xafiisyo cusub oo la dhigay raadaalada wax lagaga arko dhinaca badda, waxaana Madaxwayne ku xigeenka iyo weftigiisu warbixino ka dhagaysteen Maareeyaha dekeda Berbera Axmed Yuusuf Dirir oo ka warbixiyay guud ahaan hawlaha dekeda.

Sidoo kale waxa uu Madaxwayne ku xigeenka Somaliland Cabdiraxmaan Cabdillaahi Ismaaciil (Saylici) xadhiga ka jiray xarunta Kalluumaysatada Somaliland ee magaalada Berbera oo dhawaan laga hirgaliyay halkaas, waxa kale oo kormeer ku soo maray dhismaha waddo laami ah oo ay dawladda hoose ee magaalada Berbera ka hirgelinayso badhtamaha magaalada Berbera, waxaana halkaasi warbixin ku siiyay Maayarka magaalada Berbera Cabdalle Maxamed Cali. Socdaalka Madaxwayne ku xigeenka Somaliland ayaa noqonaya kormeerkii ugu ballaadhnaa ee uu ku tago magaalada Berbera.

Weftigan waxa xubno ka ahaa marwada Wasiirradda Wasaaradaha Maaliyadda, Warfaafinta, Duulista iyo Hawada, Agaasimayaal Guud iyo Marwada koowaad ee madaxwaynaha Somaliland Marwo Aamina Xaaij Maxamed Jirde (Aamina Weris),

Dhinaca kalena Marwada koowaad ee madaxwaynaha Somaliland Marwo Aamina Xaaij Maxamed Jirde (Aamina Weris), ayaa amaan u soo jeedisay maamulka gobolka Saaxil iyo degmada oo ay sheegtay inay wax weyn ka qabteen horumarinta adeegyada ay bulshada u hayaan.
Somaliland.org
Hargeysa

[The_Emperior5]