About:- 13 mins ago| 2 Commnets
Kulan lagu gaba gabeynayay heshiiskii dhawaan ay magaalada Gaalkacyo ku gaareen Dowlada Puntland iyo mid ka mid ah beelaha dega xaafada Garsoor ee magaalada Gaalkacyo ayaa xalay lagu qabtay xarunta madaxtooyada Puntland ee Garowe.
Kulanka xalay ka dhacay xarunta Madaxtooyada Puntland ee garowe ayaa waxaa kasoo qayb galay Madaxda ugu sareysa Puntland, Isimo, Waxgarad, Culimaa’uddiin, Cuqaal, iyo Siyaasiyiin uu kamid ahaa Gen. Maxamuud Muuse Xirsi (Cade) o ah madaxweynihii hore ee Puntland.
Ugaaska beesha beesha Tanada Daarooe (Leelkase) Ugaas Cali Ugaas Maxamuud oo munaasabadda ka hadlay ayaa sheegay in beeshu diyaar u ahayd inay la shaqeeyan dawlada ,waxana uu xusay in heshiiska xalay lagu gaaray madaxtooyada Puntland ee garowe uu yahay mid ka turjumayo in lasoo gunaanaday heshiis rasmi ahna laga gaarey ismaandhaafkii dhaliyey dagaalkii Gaalkacayo ka dhacay.
Sidoo kale waxaa madashaas isna ka hadlay Gen. Cade wuxuuna sheegay in uu aad ugu faraxsan yahay heshiiska ay wada gaareen Dowlada iyo beesha Tanade (Leelkase), General-ka o oo hadalkiisa sii wata ayaa ugu danbeyntii ugu baaqay shacabka reer Puntland in ay nabadda si wada jir ah uga shaqeeyaan.
Madaxweynaha Puntland Cabdiraxmaan Sheekh Maxamed oo isna gaba gabadii kulankaas hadal dheer ka jeediyey ayaa sheegay in heshiiska sida rasmiga ah xalay Garoowe loogu kala saxiixday uu yahay guul u soo hoyatay dadka reer Puntland meel walba oo ay joogaan.
Wuxuuna madaxweynuhu intaas ku daray in heshiiskaasi uu dhabar jab iyo guul darro u yahay dad uu ku tilmaamay inay ka shaqeeyaan isku dirka beelaha walaalaha ah kana soo horjeeda nabadda iyo xasiloonida buuxda ee ka jirta deegaanada Puntland.
Madaxweyne Faroole ayaa gaba gabadii ugu baaqay shacabka ku dhaqan deegaanada Puntland gaar ahaan kuwo reer Gaalkacayo in ay nabada deegaankooda ilaashadaan iyaga oo garowsan halka ay Puntland ka degen yihiin islamarkaana looga baahan yahay in ay ogaadaan in cid walba uu ka shaqeynta nabadda xil ka saaran yahay.
Kulankii xalay ka dhacay xarunta Madaxtooyada ee magaalada caasimada ah ee Garoowe ayaa ahaa mid horay loogu balan sanaa islamarkaana lagu soo afmeerayey heshiiskii 10-ka qodob ka koobnaa ee dhamaadkii bishii Sep ee sanadkan ay dowlada Puntland iyo Isimada iyo waxgaradka beesha Tanade (Leelkase) ka gaareen colaadii 2-da beri socotey ee ka dhacday xaafada Garsoor ee magaalada Gaalkacayo.
Maxamed Siciid Yusuf
Horseed Media
Garowe, Puntland
Dhegayso Ugaaska Beesha Tanade Daarood
Dhegeyso codka Gen. Cadde Muuse
Dhegayso Madaxzweynaha Puntland
Dhegayso Suldaan Cabdisalaam oo madasha ka hadley
http://horseedmedia.net/2011/11/30/hesh ... -afmeeray/
