Tababarkan oo ahaa labo weji ayaa waxaa ardaydii ka qayb qaatay lagu baray xirfado ay kamid yihiin Dawaarka, Naqshadeynta dharka (Kariska), Farayaamada iyo dayactirka Moobilada.
Munaasabadii tababarkaas lagu soo xirayey ayaa ka dhacday xarunta hay’adda DRC ee magaalada Qardho waxaana kasoo qayb galay maamulka degmada iyo mas’uuliyiin ka tirsan DRC.
Ugu horeyn waxaa madashaas ka hadlay Cabdiraxmaan Xaaji Cismaan oo ah madaxa mashaariicda kaabidda nolosha ee DRC, wuxuuna ka warbixiyey ujeedadii laga lahaa tababarkan iyo faa’iidooyinka ay filayaan in mustaqbalka dhow ay kasoo baxaan.
Cabdiraxmaan Xaaji ayaa sheegay in DRC ay ka go’an tahay inay taageerto bulshada qaybahooda barakacayaasha ah iyo kuwa kale ee danyarta ah si ay u helaan xirfado ay ku shaqeystaan noloshoodana ku maareeyaan.
Hibo Abshir Xuseen oo iyaduna ka tirsan DRC ayaa sheegtay in ardaydan wax la baray ay hay’addu noloshooda lasii socon doonto si loo ogaado qaabkii ay uga mira dhaliyeen aqoontii la siiyey. Hibo waxa kale oo ay xustay in DRC ay qorshaha dhow ugu jirto sidii ardaydan loo siin lahaa lacago deyn ah si ay ugu shaqeystaan noloshoodana ugu dhistaan.
Duqa degmada Qardho Maxamed Siciid (Hogaam la-roor) oo isna kamid ahaa mas’uuliyiintii munaasabadaas kasoo qayb galay ayaa u mahad celiyey DRC, wuxuuna tilmaamay in DRC ay tahay tan ugu shaqada iyo waxqabadka badan hay’adaha ka shaqeeya magaalada Qardho iyo guud ahaan gobolka Karkaar.
Duqu waxa uu isaga oo hadalkiisa sii wata xusay in loo baahan yahay hay’adaha kale ee Puntland ka shaqeeyaa inay ku daydaan DRC islamarkaana ay diiradda saaraan wax u qabashada bulshada qaybahooda tabaaleysan ee barakcayaasha iyo danyarta u badan.
Ugu daynbeyntii waxaa hadalka qadatay Isu-duwaha wasaaradda haweenka ee gobolka Karkaar Sahra Siciid Jaqanaf, waxayna ku dheeraatay ka hadalka sida ay lagama maarmaan u tahay in daryeel bini aadmino oo fiican la siiyo bulshada gaar ahaan kuwa nugul oo u baahan in dhinaca nolosha laga kaabo.
Ardaydan oo ay tiradoodu 113-qof ahayd waxaa la baray xirfado kala duwan waxayna wax soo baranayeen mudo 6-bilood ah, tababarnkan waxaa fulisey hay’adda DRC oo taageero dhaqaale ka heleysa hay’adda qaxootiga aduunka ee UNHCR.
[imghttp://mxcdn.horseedmedia.net/wp-content/uploads/2012/03/DRC_QARDHO.-28.jpg][/img]
Good job Reer Qardho.
