Warar hoose oo aan helney ayaa qeexaya iney jireen Rag aqoonyaho ah oo qaarkood Xamar joogaan kuwasoo loo direy iney keenaan qorshe(Plan B) lagu badbaadsho Soomaaliya hadii Roadmap-ku socon waayo, Aqoonyahanada ayaa hada jawaabtii keeney.
Kooxdaan oo ka kooban Aqoonyahano Soomaali ah iyo khubaro ajnabi ah oo caawinaya waxaana la sameeyey intuusan bilaaban shirkii Garowe, qorshaha ragaan loo direyna waxaa ugu waynaa in ay soo baaraan sida ay macquulka u tahay in Caasimada Soomaaliya laga wareejiyo Muqdisho, waa hadii lagu guul dareysto qorshayaasha nabada ee la bilaabay(Roadmap).
Waxaa jirey walwal laga qabay in Koonfurta laga socodsiin waayo Qorshaha nabadeynta ee Soomaaliya, waxaana fikirkaan ugu waynaa oo soo jeediyey khabiiro Qaramada Midoobey ka tirsan oo ku xeel dheer arimaha Soomaaliya , kuwasoo hoosta ka xariiqey iney ka walwal sanyihiin in Qorshaha Roadmap-ku uu ka socon waayo Qabqablayaasha dagaal ee Koonfurta Soomaaliya oo ay sheegeen iney wali awood buuxda ku leeyihiin Koonfurta Soomaaliya.
Aqoonyahanda Arintaan loo xilsaarey ee Soomaalida ah ayaa shaqadooda si hoose u bilaabay wax yar ka dib markuu dhacay shirkii ugu horeeyey ee Roadmapka oo Muqdisho lagu qabtey bishii septembar 2011, waxayna xili aan la sheegin ay soo gudbiyeen warbixin buuxda oo ku saabsan qorshahii loo direy.
Sida aan xogta ku helney waxay Gudigaan isla meel dhigeen in hadii uu socon waayo Roadmap-ku ay lama huraan tahay in Caasimada Soomaaliya loo wareejiyo meel kale si kumeel gaar ah.
Warar ka aan helney ma sheegayaan biya dhaca Qorshahaan iyo meesha loo wareejinayo Caasimada lakiin waxay hoosta ka xariiqeen gudigaan in Caasimada laga wareejiyo Muqdisho loona wareejiyo meel kale, qorshahaan wuxuu taageeero buuxda ka heystaa Qaramada Midoobey iyo Dowlada Ingiriiska.
Dowlada Ingiriisku waxba kama ogeyn markii hore baaritaankaan lakiin shirkii London waxyar ka hor ayaa loo gudbiyey si buuxda ayayna u taageereen, waliba waxay balan qaadeen dhaqaala fara badan oo lagu hirgalinayo qorshanaan.
Talyaaniga ayaa iyagu arinta ku saabsan wareejinta Caasimada ka biya diidanaa lakiin wuxuu balan qaadey inuu taageerayo hadii Roadmapku socon waayo.
Hanaanka geedi socodka(Roadmap-ka) ayaa ka kooban in kumeelgaarnimada laga baxo bisha Ogosto 2012, in Baarlamanka layareeyo, in Dustuurka cusubna la hirgaliyo iyo Xukuumada hada jirta aysan dhaafi karin bisha ogosto doorashana la qabto isla bishaas.
qorshahaan oo isku duuban waxaa u horeeya hirgalinta Dustuurka oo sal dhig u ah Roadmap-ka, hadii la hir galin waayana Roadmap ma jirayo, waxaa sidaas hoosta ka xariiqay gudigaan Aqoonyahanada ah.
Markii ay Xogtaan soo gaartey warbaahinta Puntlandi.com waxaan bilownay baaritaano ku saabsan meelaha la hadal hayo in caasimada loo wareejiyo, waraysiyo hoose oo aan la yeelanay dublamaasiyiin waxay noo xaqiijiyeen inay lama huraan tahay in Caasimada laga wareejiyo Muqdisho hadii khalkhal la galiyo Geedi socodka, Caasimadana waxaa la isla meel dhigey waa fikirka dublamaasiyiinta aan la xiriirney u batay in caasimadu noqon doonto ´magaalo ku taal Puntland ama Somaliland.
Mar aan wax ka waydiiney Dublamaasiyiinta mar hadii caasimada la wareejiyo maxaa laga yeelayaa koonfurta, waxay isku raaceen sidan…
Soomaaliya uma xayirnaaneyso koonfurta lakiin waxaa lama huraan ah in xal loo raadiyo deganaanshaha koonfurta xalkaasina wuxuu imaan kara markii caasimad la helo.
