ما شاء الله
بسم الله الرحمن الرحيم
Dr Cumar Salaad Cilmi oo ka mid ah siyaasiyiinta Soomaaliyeed oo shalay dib ugu soo laabtay dalka, ayaa wuxuu shaaca ka qaaday in uu yahay musharax u taagan xilka madaxtinimada ee Soomaaliya ee sanadkaan la-qabanaayo.
Cumar Salaad Cilmi oo dib shalay Magaaladda Muqdisho ugu soo laabtay, ayaa wuxuu si weyn oo diiran loogu soo dhaweeyay Garoonka Diyuuradaha Aadan Cadde ee Magaaladda Muqdisho, waxaana soo dhaweyntiisu ka qeyb qaatay Taliyihii hore ee Ciidamadda Booliska ee Dowladda Kmg ah ee Somaliya General Cabdi Xasan Cawaale “Qeybdiid” iyo Wasiiru Dowlihii hore ee Wasaarada Gaanshaandhiga ee Xukuumadda Kmg ah ee Soomaaliya General Yuusuf Maxmed Siyaad “Indha Cadde”.
Siyaasiga Cumar Salaad Cilmi oo shalay shaaciyay in uu yahay musharax, ayaa wuxuu ka hadlay baahida ku kaliftay in uu xilkaan culus uu isu soo taagay, isla-markaana wuxuu sheegay inuu doonaayo inuu wax ka qabto xaaladda adag ee ka ka jirta dalka.
“Waxaan doonyaa in si daacadnimo leh aan wax ugu qabto dalkeega iyo dadkeega” ayuu yiri Cumar Salaad Cilmi, isagoona intaasi ku daray in wixii aqoontiisa ah uu ku hogaamin doono dalka iyo dadka Somaliyeed, sida uu yiri.
Wuxuu sheegay in kursiga madaxtinimada ee Soomaaliya lagu raadsado lacago iyo maal uruursi, balse isagu wuxuu sheegay inuusan sidaasi u socon, ee uu doonaayo sida uu sheegay inuu wax ka qabto xaaladda adag ee ka jirta dalka.
Sidoo kale wuxuu shacabka Somaliyeed uu ka dalbaday inay taageeraan tallaabada uu isu soo taagay, isagoona balan qaaday inuu la’imaan doono hawl-karnimo iyo hufnaan shaqo, haddiiba loo-doorto Madaxweynaha dalka.
