----
http://horseedmedia.net/2013/05/16/maxa ... sawirocod/
Maxamuud Cabdiraxmaan Cuuke oo ku dhawaaqay inuu yahay Musharax utaagan xilka Madaxweynaha Puntland (Sawiro+Cod)
| on May 16, 2013
0 Comments
Gudoomiyihii hore ee gobolka Mudug horeyna usoo ahaan jiray Agaasimaha guud ee Wasaaradda Waxbarashada Puntland Mudane Maxamuud C/raxmaan Cuuke ayaa waxaa uu isu soo taagay xilka Madaxweynaha Dawladda Puntland.
Munaasabad si heer sare ah loo soo agaasimay oo ahayd xaflad qado sharaf ah ayuu Mudane Cuuke u sameeyay Siyaasiyiin, Waxgarad, Aqoonyahan, Dhallinyaro, Culimaa’udiin, Haween iyo Marti sharaf kale, munaasabadaasi oo uu Mudane Cuuke ku shaaciyay in uu yahay Musharax u taagan Xilka Madaxweynaha Dawladda Puntland.
Musharax Cuuke ayaa dadweynihii xafladiisa kasoo qeybgalay wuxuu uga sheekeeyay halka ay marayso xaalada dalka gaar ahaan Puntland, wuxuuna sheegay in uu doonayo in uu wax badan ka badalo sida ay haatan tahay Puntland, haddii loo doorto xilka Madaxweynaha Puntland.
Mudane Maxamuud C/raxmaan Cuuke ayaa wuxuu shaaca ka qaaday haddii loo doorto Madaxweynaha Puntland in uu dalka ka hirgelin doono waxbarasho lacag la’aan ah, caafimaad dalka gudihiisa laga helayo oo bilaash ah, amaanka oo uu sheegay in uu gacan bir ah ku qaban doono, siyaasada gudaha iyo dibada oo uu sheegay in uu sare u qaadi doono, isagoona sheegay in balan qaadyadaasi iyo kuwa kale oo badan in uu doonayo in uu dalka ka hirgeliyo waa haddii Madaxweyne loo doorto.
Dhagayso Codka Musharax Cuuke
Musharaxa ayaa tusaale u soo qaatay waxqabadkiisii Wasaaradda Waxbarashada iyo sidoo kale intii uu hayay xilka Gudoomiyaha Gobolka Mudug, xilalkaasi oo uu sheegay in uu u gutay si waafaqsan sharciga isagoo sheegay in uusan lunsan hanti shacab.
Mudane Cuuke waxaa uu sheegay in uu cadaalad iyo sinaan ku dhaqi doono shacabka Puntland haddii loo doorto Madaxweynaha Puntland, wuxuuna hadalkiisa ku daray in uu noqon doono qofka ugu awooda yar dawladiisa marka loo doorto Madaxweyne, wuxuuna sheegay in uusan awooda ku faragashan doonin hay’addaha Xukuumada.
Waxgarad, Odayaal dhaqan, Siyaasiyiin, Dhallinyaro iyo Ururada haweenka qeybahooda kala duwan ayaa xaflada ka hadlay, waxayna Musharax Cuuke ku taageereen sida geesinimada leh ee uu isu soo sharaxay, waxayna u balan qaadeen in ay siin doonaan codkooda oo ay ku taageeri doonaan in uu xilkaasi ku guuleysto.
Xildhibaan Siciido Geelle Diiriye oo ka mid ah Mudanayaasha Golaha Baarlamaanka Puntland ayaa Musharax Cuuke ku taageertay hadafkiisa ku aadan in uu noqdo Madaxweynaha Puntland, waxayna ka codsatay in uu cadaalad iyo sinaan dadka ku dhaqo haddii loo doorto xilkaasi.
Musharaxa ayaa horey usoo qabtay xilalka Agaasimaha Guud ee Wasaaradda Waxbarashada Puntland iyo xilka Gudoomiyaha Gobolka Mudug iyo Duqa Magaalada Gaalkacyo, wuxuuna xilalkaasi oo muddo kooban uu hayay uu ka qabtay guulo la taaban karo oo ay weli qaarkood shacabku ku xasuustaan Mudane Cuuke.
Dowladda Puntland ee uu hoggaamiyo Cabdiraxmaan Faroole ayaa doorashadii 2009 loo igmadey in ay xilka hayaan 4 sano, waxa uu ballan qaadey in doorashada danbe ay u dhici doonto nidaamka Dimoraadiga ah ee qofwalba codkiisa ku soo dooranayo Xildhibaanada dooranaya Madaxweynaha, taasi may dhici, Waxaana sanadkii 2012 xilka loo kordhiyey Xukuumadda oo laga dhigey 5 sano halkii ay ka ahayd 4 sano, Musharixiin hore isugu soo taagey in sanadkan 2013 Bisha Janaayo ay u tartamayaan xilka Madaxweynaha ayaa ku hungoobey wax doorasho ah ma dhicin, iyada oo waqtigu aad u yarayd waxaa hadda Xukuumadda jirta ay sheegtey in Doorashooyinka Goloyaasha deegaanku dhacayaan 30 June 2013, Dad badan ayaa aaminsan in doorashada Madaxweynuhu ay u dhici doonto sidii hore ay ugu dhici jirtey, Musharaxan cusubna ee Cabdiraxmaan Cuuke iskama so sharixin Xisbiyada hadda isu diyaarinaya Doorashada goloyaasha Deegaanka.
