Waxaa maanta soo gabagaboobay kulankii Saddexaad ee madaxda maamul Goboleedyada, Ra’isul Wasaare Rooble iyo waliba Gudoomiyaha gobalka Banaadir uga socday Teendhada Afisiyooni kaa oo looga arrinsanayo doorashooyinka Qaranka.
Inta badan waxaa la isku fahmay arrimaha shirka looga hadlayay wallow maanta ay aheyd maalintii ugu adkeyd ee shirka oo madaxda ay si adag ugu doodeen qodobada hor tabinta leh sida arrinta kuraasta gobalada Waqooyi oo wali aan wax heshiis ah laga gaarin kaa oo hadda noqday qodobka ugu adag ee la isku hayo.
Balse waxaa maalmihii Koowaad ee shirkaba heshiis laga gaaray arrinta Gobalka Gedo halkaa oo aheyd meesha ugu daran ee isfahm waaga uu ka jiray shirarkii Dhuusomareeb iyo waliba kii kan ka horeeyay ee FARMAAJO hogaaminayay oo Afisiyooni ka socday.
Dowladda Federalka ayaa maamul gaar ah u magacawday gobalka Gedo, iyadoo ciidan farabadan ku daabushay islamarkana la heshiisay Cabdirashiid Janan oo ciidan aad u badan ku wareejiyay garabka Dowladda Federalka ee Balad Xaawo.
Dowladda Federalka iyo maamulka Jubbaland ayaa isku heystay maamulka gobalka Gedo halkaa oo doorashada inkabadan 10 Xildhibaan la filyay iney ka dhacdo, waxaana dowladda ay u arkeysay mid muhiim u ah halka Jubbaland ay ku doodeysay in gacan ku heynta gobalka Gedo lagu soo wareejiyo.
Xogo uu helay Warqaad ayaa waxa ay sheegayaan in madaxweynaha Jubbaland Axmad Madoobe uu sameeyay tanaasul farabadan islamarkana Ra’isul Wasaare Rooble uu arrintan uga shaqeeyay si adag.
Sidoo kale xogta aan helnay ayaa intaas ku dareysa in wax doorasho ah aan lagu qaban doonin gobalka Gedo islamarkana doorashada Jubbaland ay ka dhici doonto kaliya caasimada ku meel gaarka ah ee Kismaayo ee maamul goboleedka Jubbaland.
Arrimahan ayaa la saadaalinayaa iney fududeeyeen in isfaham laga gaaro doorashooyinka kuraasta Xildhibaanada Golaha shacabka ee ka imaanaya Jubbaland.
Muqdisho-Somalia
