Dagaalo qaraar oo ka soconaya magaalada Kismaayo

[Hiiraan boy]

Dagaalo qaraar oo ka soconaya magaalada Kismaayo

Click here to find this article in English

Kismaayo 23, April.07 ( Sh.M.Network) Dagaalo aad u culus ayaa maanta waxa ay ka soconayaan magaalada Kismaayo, dagaalkaasi oo u dhaxeeya ciidamada dowladda oo u kala qeybsamey labo beelood ayaa waxa uu geeystay qasaaro naf iyo maalba leh.

Dagaalkaan oo ka bilowday magaalada Kismaayo 9:30 kii subaxnimo, waxaana uu soconayaa ilaa iyo haatan, iyadoo inta la ogyahay ay ku nafwaayeen in ka badan 6 ruux halka tiro kalena ay ku dhaawacmeen sida ay ku warameen ilo xagga caafimaadka ah oo ku sugan Magaaladaasi, iyadoo 3 ka mid ah dadka geeriyooday ay ahaayeen ciidamadii iska soo horjeeday.

Dagaalkaan ayaa haatan waxa uu ka soconayaa agagaarka Aaargada oo fariisin ay ka dhigteen ciidamada Guutada koowaad ee dowlada KMG ah.

Wararkii ugu dambeeyay ee aynu ka helnay magaalada Kismaayo waxa ay sheegayaan in ciidamada oo u kala qeybsamay labo beelood ay wali hayaan magaalada Kismaayo, inkastoo dagaalka uu yara qaboobay.

Ma jiro wax war ah oo ka soo baxay dowladda KMG ah ee Somalia oo ciidamadeeda ay ku dagaalamayaan magaalada Kismaayo.

Ciidamada ku dagaalamaya magaalada Kismaayo ayaa waxa ay ku kala qeyb yihiin Madaxweyne C/laahi Yuusuf iyo Col. Barre Hiiraale oo ah wasiirka G/dhigga dowladda KMG ah