AU troops began removing land mines in Mugadisho

[DONKEYMAN]

Ciidamada Midowga Africa oo howl-gallo miino saarid ah ka bilaabay Muqdisho
Click here to this article in english

Mogadishu 13, May.07 ( Sh.M.Network) Ciidamada Midowga Africa ee jooga Somalia ayaa maanta waxa ay shaaca ka qaadeen in ay bilaabeen howl-gallo miino saaris ah oo ay ka fulinayaan caasimadda Somalia, xilli miinooyin badan ay ku qarxeen wadooyin ku yaala caasimadda.


Afhayeenka ciidamada AMISOM ee jooga Somalia, Captain Paddy Ankunda oo suxufiyiinta kula hadlay maanta Dugsigii tababarka ciidamada Booliska ayaa waxa uu sheegay in maanta wixii ka dambeeya ay bilaabeen barnaamij cusub oo magaalada ay uga saarayaan miinooyinka magaalada gudaheeda.

Afhayeenka waxa uu sheegay in dowladda KMG ah aysan laheyn ciidamo u tababaran baaritaanada miinooyinka iyo qataraha ay leeyihiin, isagoo ka codsaday shacabka in ay kala shaqeeyaan ciidamada sidii looga badbaadin lahaa qaraxyada miinooyinka dhulka lagu aaso oo ay ku nafweyn karaan dadka.

" Waxaan ka codsanayaa dadka Somaliyeed in ay naga caawiyaan, maadaama aanu bilownay barnaamij cusub oo aanu ku saareyno miinooyinka lagu aaso wadooyinka" ayuu yiri Captain Paddy Ankunda, isagoo sheegay in hadii aan lala shaqeyn aysan u suurto galeyn in ay helaan war bixino.

Hadalka Captain Paddy Ankunda ayaa ku soo beegmay xilli maalmihii la soo dhaafay magaalada Muqdisho ay hareeyeen qaraxyo ka dhashay miinooyin lagu aasay dhulka oo lala beegsaday gawaari ay wateen ciidamada dowladda KMG ah.