Muqdisho, Somaliya (Calanka.com) - 11-Juun-2010
Caasimadda Soomaaliya "Muqdisho" ayaa si weyn looga soo dhaweeyay furitaanka Ciyaaraha Koobka Adruunka ee maanta si rasmi ah uga furmay dalka South Afrika, waxaana labadii ciyaar ee koobka lagu furay ay dadku si toos ah uga daawanayeen goobo loo diyaariyay oo ay soo buux dhaafiyeen kumanaan kubadda jecel oo isugu jira, dhalinyaro, caruur, haween iyo dad waaweyn.
Degmooyinka ay dowladdu gacanta ku hayso ee magaalada Muqdisho ayaa si weyn looga dareemayay damaashaadka Koobka Aduunka, waxaana goobahan sida wada jirka ah loogu daawanayay ciyaaraha lagu arkayay dhalinyaro iyagu kasoo hayaamay goobaha ay gacanta ku hayaan kooxaha Islaamiyiinta kuwaasoo iyagu mamnuucay daawashada ciyaaraha.
Horjooge ka tirsan maleeshiyaadka Xisbul Islaam islamarkaana u qaabilsan dhanka hadalka Sh. Maxamed Cabdi Aroos oo maanta ka hadlay furitaanka Ciyaaraha Aduunka ayaa sheegay in ay mamnuuceen daawashada ciyaaraha, wuxuuna intaa ku daray in uusan Islaamka shaqo ku laheyn arintan islamarkaana ay dhalinyarada uga digayaan in ay daawadaan.
Dadweyne badan ayaa maanta uga soo hayaamay goobaha ay gacanta ku hayaan kooxaha islaamiyiinta dhanka degmooyinka ay dowladdu joogto si ay u daawadaan furitaanka Ciyaaraha Aduunka.
