some picturesGaalkacyo (RBC Radio):- Hay’ada Tadamun ayaa maanta dhagax dhig u sameysay dhisme weyn oo loo asteeyay in laga dhiso machad lagu baran doono arimaha beeraha iyo xanaanada xoolaha.
Munaasabad loo sameeyay dhagax dhiga dhismaha machadka ayaa waxaa kasoo qeybgalay mas’uuliyiin ay ka mid yihiin Ra’isulwasaare xigeenka ahna Wasiirka Qorsheynta iyo Xiriirka Caalamiga ah ee Dawladda FKMG Soomaaliya Mudane C/weli Maxamed Cali, Wasiirka Beeraha iyo Waraabka Puntland Mudane Xasan Cabdi Maxamuud, Wasiir xigeenka Waxbarashada Puntland Mudane Cali Axmed Gamuute, Wasiir xigeenka Xanaanada iyo Xoolaha Mudane C/weli Xirsi Nuur, Duqa degmada Gaalkacyo Mudane C/raxmaan Maxamuud Xaaji iyo Maamulka iyo Shaqaalaha Hay’ada Tadamun.
C/laahi Shiikh Xasan oo ah mas’uulka u sareeya Hay’ada Tadamun ayaa waxaa uu ka hadley munaasabada dhagax dhiga dhismaha machadka lagu baran doono arimaha beeraha iyo xanaanada xoolaha, waxaana Gudoomiyuhu sheegay in dhismaha machadkani dhaqaalaha ku baxaya uu ka yimid Bangiga horumarinta Islaamka,(Islamic Development Bank) iyadoo mashruuca dhismahana ay fulineyso Hay’ada Tadamun Social Society.
Gudoomiyaha Tadamun waxaa uu si qoto dheer uga waramay marxaladihii ay usoo mareen in dhismaha machadkani la hirgeliyo, isaga oo intaa ku daray in uu noqon doono mid ay ardey badan ka faa’ideystaan duruusta laga bixinayo, isla markaana ardeygii ka baxa machadkaasi uu qaadan doono Diploma, ardeyga dhiganayana uu noqon doono mid ka soo baxay ama soo maray dugsi sare, waxaana machadku uu noqon doonaa mid yeelanaya qeybaha fasalada waxbarashada, qolalka jiifka, masaajid iyo qeyb cunto karin ah.
Duqa degmada Gaalkacyo Mudane C/raxmaan Maxamuud Xaaji ayaa mahad celin balaaran ujeediyey mas’uuliyiinta Hay’adaha Islamic Development Bank iyo Tadamun Social Society, isaga oo sheegay in labadaasi hay’adood ay guulo wax ku ool ah usoo hoyeen shacabka magaalada Gaalkacyo, maadaama machadkani ay Gaalkacyo nasiib u yeelatay in laga dhiso, ayna si weyn uga faa’ideysan doonaan mustaqbalka ardeyda Puntland oo dhan.
Wasiirka Beeraha iyo Waraabka ee Puntland Mudane Xasan Cabdi Maxamuud oo isagu ka mid ahaa mas’uuliyiintii ka socotay maamulka Puntland ee ka qeybgashay munaasabada dhagaxdhiga dhismaha machadka ayaa sheegay in uu ku faraxsan yahay machadka cusub ee la dhagaxdhigay, isaga oo mahad celin balaaran ujeediyey dhamaan dhinacyadii isu xil qaamay in ay machadka laga furo magaalo ka mid ah kuwa Puntland gaar ahaan hay’adaha Tadamun iyo Bangiga horumarinta Islaamka.
Ugu dambeyn Ra’isulwasaare xigeenka ahna Wasiirka Qorsheynta iyo Xiriirka Caalamiga ah ee Dawladda FKMG Soomaaliya Mudane C/weli Maxamed Cali ayaa halkaasi ka hadley una mahadceliyay dhinacyada barnaamijka dhismaha machadka iska kaashaday, wuxuuna hadalkiisa ku daray in la barto beeraha iyo xanaanada xoolaha ay tahay mid ahmiyad weyn uleh bulshada Soomaaliyeed, maadaama dadka Soomaaliyeed dhaqaalahoodu uu ku tiirsan yahay xoolaha nool sida uu Ra’isulwasaare xigeenku hadalka u dhigay.
Waa machadkii ugu horeeyay ee noociisa ah oo laga hirgaliyo deegaanada maamulka Puntland, waxaana dhismaha machadka laga dhisayo uu ku fadhiyaa dhul cabirkiisu dhan yahay 100*200, dhulkaasi oo ay maanta dhagaxdhigeen mas’uuliyiinta kala ah Ra’isuwasaare xigeenka ahna Wasiirka Qorsheynta iyo Xiriirka Caalamiga ah ee Dawladda FKMG Soomaaliya iyo Wasiirka Beeraha iyo Waraabka Puntland.
RBC Radio.
