Mashaariicda horumarinta degmada Gaalkacyo ayaa ah laba mashruuc oo lagu dhisayo wado dheer oo saddex km ah, taasi oo si toos ah u gasha Garoonka Diyaaradaha magaalada Gaalkacyo iyo sidoo kale dayactir balaaran oo lagu sameynayo Garoonka kubada cagta ee Cawaale Stadium Gaalkacyo.
Duqa Degmada Gaalkacyo C/raxmaan Maxamuud oo dhagax dhigayey mashaariicdaasi ayaa RBC Radio u sheegay in mashaariicdani ay yihiin kuwa horumarinta degmooyinka ee ay taageerto Hay’ada Qaramada Midoobay u qaabilsan dhinaca horumarinta ee UNDP.
Mudane C/raxmaan waxaa uu hadalkiisa ku daray in wadada Garoonka diyaaradaha gasha oo 3km ah la dhisayo, qandaraaska dhismaha wadadaasina ay qaadatay shirkada John Consturction Company, iyadoo dhinaca biyo dageenka Cirjiife uu Gudoomiyuhu sheegay in la marin doono buundo yar oo dhirir ahaan gaareysa 10m, balac ahaana gaareysa 6m, si biyaha galaya Cirjiife ay hoos uga maraan jidka loo dhisayo in uu galo Garoonka diyaaradaha magaalada Gaalkacyo.
Duqa Gaalkacyo oo dhagaxdhigay wadada garoonka diyaaradaha Gaalkacyo oo ladhisayo
Dhinaca kale Duqa Gaalkacyo waxaa uu dhagax dhigay mashruuca lagu dhisayo Garoonka kubada cagta ee Cawaale Stadium Gaalkacyo, waxaana qandaraaska lagu dhisayo garoonka qaatey shirkada Muumin Construction Company oo maantaba bilowday shaqada Garoonka, iyadoo shaqaalaha shirkadaasi ay guda galeen in dhagxaanta ay ka bixiyaan gudaha garoonka gaar ahaan halka ciyaartooydu kubada ku ciyaarto.
Garoonka kubada cagta Gaalkacyo oo dayactir ku bilowday
Garoonka kubada cagta Gaalkacyo oo mudooyinkan dambe aan helin wax dayactir ah ayaa haatan dib u dayactir balaaran lagu sameynayaa, waxaana la dhisayaa derbiyada garoonka oo uu burbur ka muuqdo, ganjeelooyinka oo dayacan iyo halka lagu ciyaaro oo dhagaxda laga soo bixinayo.
Wadada Garoonka Diyaaradaha Gaalkacyo oo lagu bilaabay dhisme
Duqa Degmada Gaalkacyo C/raxmaan Maxamuud ayaa sheegay in mashaariicdani ay xigi doonaan kuwa kale oo bulshada looga faa’ideynayo, isagoo intaa ku daray in loo baahan yahay in Jaaliyada dibada ee gobolka Mudug iyo ganacsatadaba ay soo taageeraan mashaariicdani, maadaama sida Gudoomiyuhu sheegay in wadada aada Garoonka diyaaradaha Gaalkacyo waxa laga dhisayo uusan ahayn laami haddana haddii ay gacan ka geystaan shacabka Gaalkacyo iyo Jaaliyada Dibada ay suurtagal noqon karto in laami laga dhiso.
Mas'uuliyiinta degmada oo goobjoog ka ah dhismaha wadada garoonka diyaaradaha
Labadan mashruuc ayaa dhaqaalaha ku baxaya waxaa uu yahay lacag konton kun kor u dhaafeysa oo ku baxaysa wadada aada Garoonka diyaaradaha Gaalkacyo iyo sidoo kale lacag sodon iyo dhowr kun ah oo lagu bixinayo dib u dayactirka garoonka kubada cagta ee Cawaale Stadium.
