SL admit the defeat from SSC and no more cowboy style

[FBISOMALIA]

Faarax Macalin: Madaxweynaha Somaliland Wuu Ogolaaday In Ciidamadiisa Kala Laabto Buuhoodle

Hargeysa (RBC) Gudoomiye ku xigeenka baarlamaanka Kenya Faarax Macalin Maxamed oo maanta booqasho ku tegey magaalada Hargeysa ayaa sheegay in wada hadal uu la yeeshay madaxweynaha Somaliland Axmed Siilaanyo uu kala hadlay arinta degmada Buuhoodle.

Faarax Macalin oo galabta warfidiyeenka la hadlay ayaa sheegay in madaxweynaha Somaliland uu ogolaaday in ciidamadiisu ka soo celiyo Buuhoodle isagoo sheegay in dhiig dambe oo ku daata Buuhoodle aan la aqbali karin.

“Waxaan ka wada hadalnay in dagaalka la joojiyo oo wada hadal wax walba lagu xaliyo, dadku waa dad wada dhashay waa dad xidid iyo ehel ah waa dad ay taariikh dheer ka dhaxayso marka anaga waxaan qabnaa in wixii ka dhacay Buuhoodle aan loo baahneyn” ayuu yiri Faarax Macalin.

Faarax Macalin wuxuu sheegay in uu dhanka kalana la xiriiray hogaanka dhaqanka ee beelaha Sool iyo Sanaag uuna kala hadlay sidoo kale nabadeynta uu u yimid Hargeysa, wuxuuna sheegay inay si fiican ugu jawaabeen.

“Sidoo kale waxaan dadka iyo waxgaradka reer Buuhoodle ugu baaqayaa inay colaada qaboojiyaan, wax kastana laga hormariyo nabadda, wixii jira halaga wada hadlo” ayuu yiri Faarax.

Faarax oo la weydiiyey shirka Taleex ee looga dhawaaqay maamulka cusub ee KHAATUMO STATE ayaa wuxuu sheegay in wax kasta ay ku xiran yihiin sidii la isku afgarto, laakiin aan loo baahneyn in dad Soomaaliyeed la dilo.

Ma jirto wax hadal ah oo dhanka Somaliland ka soo baxay oo la xiriira hadalka Faarax Macalin ee ah in Somaliland ay joojineyso duulaanka Buuhoodle. Waxaase uu hadalka Faarax yimid iyadoo maanta dagaal kooban uu markale duleedka magaalada Buuhoodle ku dhexmaray ciidamada Somaliland iyo ciidamada deegaanka Buuhoodle.

Dagaal Axadii magaalada Buuhoodle ka dhacay ayaa waxaa uu geystay dhimashada ugu yaraan toban ruux iyo dhaawac fara badan oo qaarkood lagu daweynayo isbitaalka Gaalkacyo.

RBC Radio
Xafiiska wararka Hargeysa