http://nuclearworldaction.com/target.html Golaha salaadiinta beesha Jareerweyne oo daboolka ka qaaday inuusan iyaga metelin xubinta beesha 5-aad uga mid noqotay 5-ta xubnood ee guddiga dib u heshiisiinta Qaranka
Kulan ay maanta isugu yimaadeen xubnaha golaha salaadiinta beesha Jareerweyne oo ka dhacay guriga Ugaas Cabdi Xasan Yarow oo ku yaala xaafada Buulo Xuubey degmada Wadajir ee magaalada Muqdisho ayaa looga hadlay xaaladihii ugu dambeeyey ee dalka Soomaaliya iyo doorka beeshaasi ay ka qaadan karto taabagelinta shirka dib u heshiisiinta ee dhowaan madaxweynaha dowladda federaalka Soomaaliya C/llaahi Yuusuf Axmed u sheegay in lagu qaban doono magaalada Muqdisho 16-ka bisha soo socota ee Abriil.
Afhayeenka golaha salaadiinta ee beesha Jareerweyne Ugaas Xaaji Xuseen Maxamed Macalin oo kulankaasi ka dib saxaafada la hadlay ayaa sheegay in beesha Jereerweyne ay si weyn uga soo horjeedo in nidaamka beelaha Soomaaliyeed wax loogu qeybinayo uu noqdo 4.5 oo sidaa darteedna aysan aqbali doonin “Nama metelo xubinta beesha 5-aad uga midka ah guddiga shirka dib u heshiisiinta Qaranka ee la magacaabay, waxaana sidoo kale cadeyneynaa in beesha ay weligeedba ku dulmaneyd nidaamka wax loogu qeybiyo beelaha Soomaaliyeed talada dalka iyadoo ka mid ah beelaha waaweyn oo wax ka dega ilaa 10 gobol oo Soomaliya ka tirsan†ayuu yiri afhayeenka oo intaa ku daray in beelaha Soomaaliyeed ay horey u cadeeyeen inaanu iyaga ka iman go’aanka sheegaya in 4.5 wax lagu qeybiyo, iyagoo soo bandhigay qoraal arrintaasi la xiriira oo beelaha Soomaliyeed ay saxiixeen, wuxuuna afhayeenku ka codsaday dowladda federaalka Soomaaliya iney joojiso nidaamka loo yaqaano 4.5 oo uu xusay in beesha Jareerweyne ay ku dulman tahay, si weyna ay u dhibsadeen bacdamaa buu yiri beeshu ay ka mid tahay beelaha waaweyn.
Sidoo kale waxa halkaasi ka hadlay guddoomiyaha golaha salaadiinta beesha Jareerweyne Malaaq Maxamed Sharey Iimaan oo isaguna tiilmaamay in beeshaasi aysan ka qeyb geli doonin ayna qaadici doonto kulanka dib u heshiisiinta ee 16-ka Abril la qaban doono haddii dowlada federaalku ay beelahaasi ku sii wado iney wax ugu qeybiso nidaamka 4.5, wuxuuna intaa ku daray guddoomiyuhu iney nasiib daro tahay iyo meel ka dhac in beesha Jareerweyne oo ka mid ah beelaha Soomaaliyeed ee waaweyn ay ka dhex muuqan weydo guddiga 5-ta xubnood ka kooban ee loo magacaabay iney maamulaan shirka dib u heshiisiinta Qaranka, isagoo sheegay in siyaasiyinta beeshaasi uga midka ah dowladda federaalku aysan awood u laheyn iney arintaasi ka dhaadhiciyaan mas’uliyiinta sare ee dowladda sababo la xiriira iyagoo ilaashanaya danahooda gaarka ah, wuxuuna ugu baaqay dowlada federaalka Soomaaliya iney cabashadooda wax ka qabato.
Kulankaasi oo ku soo dhamaaday jawi aad u wanaagsan ayaa xubnaha golaha salaadiinta Jareerweyn ka qeyb galay kulankaasi ka mid ahaa Suldaan Cali Muuse Xasan, Ugaas Sheekh Xasan Yare, Ugaas Cali Cabdi Aadan, Ugaas Macalin Xasan Daa’uud iyo kuwo kale oo aad u fara badan.
Xafiiska Muqdisho, Somalia
News Update in English
www.dayniileone.com.
