Abaabulka ciidan iyo Xiisadaha dagaal ee ka dhex aloosan kis

[Hiiraan boy]

Abaabulka ciidan iyo Xiisadaha dagaal ee ka dhex aloosan dhinacyada isku haya Kismaayo oo sii laba lixaadsaday 24-kii saac ee la soo dhaafay, ka dib markii..

Waxaa saacadba saacada ka dambeysa sii kordhaya diyaar garow dagaal ee ka taagan beelihii dhowaan ku dagaalamay magaalada Kismaayo ee gobolka J/hoose, ee ku kala sugan gudaha magaaladaasi iyo tuulada Buulo Guduud oo ku taala duleedka woqooyi ee magaalada Kismaayo, halkaasoo mudooyinkanba ay ka taagnaayeen xiisado coladeed u dhexeeya labadaasi beelood.

Dhinacyadan oo maalmahanba isku hor fadhiyey duleedka magaalada Kismaayo, dagaalo goos goos ahna ay dhexmarayeen labada ciidan ayaa la sheegayaa iney ku kala sugan yihiin meel isu muuqata oo isu jirta ilaa 1-km wax ka yar, waxaana abaabulka ciidan la sheegayaa in si weyn looga dareemay deegaano ku yaala gobolka Gedo gaar ahaan degmada Baardheere oo iyadu la sheegay in maleeshiyooyin fara badan oo ka tirsan beesha Sadde ay iska soo abaabulayaan, iyagoo ku soo wajahan magaalada Kismaayo si ay magaaladaasi uga difaacaan dhinaca ka soo horjeeda ee ku sugan Buulo Gaduud.

Dhinaca kale, Maleeshiyooyin aad u fara badan oo ka soo jeeda beesha Absame kana yimid dhinaca magaalada Bu’aale ee gobolka J/dhexe ayaa soo gaaray degmada Jilib ee gobolka J/hoose, kuwaasoo ku hubeysan noocyada kala duwan ee baabuurta dagaalka, waxaana la sheegayaa in maleeshiyooyinkan uu hogaaminayo xildhibaan ka tirsan baarlamanka federaalka Soomaaliya oo lagu magacaabo Geele fariid, lamana garanayo ujeedada ay halkaas u tageen iyo waxa ay damacsan yihiin.

Xiisadaha colaadeed ee ka taagan gobolada Jubbooyinka oo ka soo bilaabatay dagaal Kismaayo ku dhexmaray ciidamo ka wada tirsan dowladda federaalka Soomaaliya oo markii dambe u kala baxay laba beelood ayaa u muuqda mid faraha ka sii baxaysa, iyadoo dowladda federaalka Soomaaliyana ay ku guuldareysatay iney wax ka qabato xalinta dhibaatadaas, waxayna u muuqataa hadda iney indhaha ka daawaneyso colaadaha ka jira gobolka oo haddii intey goori goori tahay aan wax laga qaban keeni karta iney salfadaan nafaf badan.



Xafiiska wararka ee Muqdisho, Somalia
dayniilecom@hotmail.com