Meydka nin si xun loo soo jirdilay ayaa saaka laga helay agagaarka Warshadii Hore ee Baastada, halkaasoo fariisin u ah Ciidamada Ethiopia.
Ninkan oo da'diisu lagu qiyaasay 30sano jir ayaa rasaas fara badan kaga taalay qeybo ka mid ah jirkiisa, iyadoo si xun loo soo jirdilay.
Dadka Deegaanka ayaa sheegaya in Ninkan Xalay Fiidkii la dilay, balse aysan cadeyn karin cida rasmi ahaan u dishay, iyagoo sheegay in ay maqlayeen rasaas dhaceysay.
Fariisimaha Ciidamada Ethiopia ayaa inta badan xilliyada habeenkii waxaa ka dhaca dilal iyo tacadi ay u geysanayaan dadka ka ag dhow, iyadoo dhowaan ay dilal ceynkan oo kale ah ay u geysteen dad rayid ah oo aan waxba galabsan, kuwaasoo ay si xun u jirdileen, deetana ay rasaas huwiyeen.
Dhanka Kale waxaa xalay Magaalada Muqdisho ka dhacay weeraro iyo qaraxyo u muuqday in lagu soo dhoweynayay Munaasabada 1-da Luulyo, waxaana Magaalada xalay rasaas socotay dhowr iyo toban daqiiqo ay ka dhaceen Degmooyinka Hodan iyo H/wadaag.
Kooxo aan la garaneyn ayaa weerar ku qaaday saldhiga Degmada H/wadaag iyo Isgoyska KPP, iyadoo qaraxyo iyo iska hor imaadyo xoogan ay ka dhaceen halkaas oo fariisimo ah Ciidamo ka tirsan Dowladda Kmg ah.
Gantaalaha garbaha laga tuuro iyo hubka noocyadiisa kala duwan ayaa si weyn leysu adeegsaday, iyadoo dadka deegaanka xalay u aheyd habeen naxdin iyo argagax laheyd.
Lama soo sheegin wax qasaaro ah oo ka dhashay weeraradii iyo qaraxyadii xalay ka dhacay Magaalada, iyadoo ay ku soo beegmeyso, xilli xalay Magaalada laga xusay Munaasabada 1-da Luulyo.
Ilaahey ha u naxariisto
