SDWO(Hargeisa 01/01/09) Magaalada Hargeysa oo ay aad ugu soo kordhayso sidashada mindiyaha loo yaqaano Toorayda taasi oo sababta in labadii is afdhaafaanba ay isku dhuftaan oo ay noqotay hubka casirga ah ee hada laga adeegsado magaalooyinka Somaliland maadaama aan hubka caadiga ah magaalada lagu dhexqaadan karin.
Tan iyo shalay ayaa tirada lagu dilay magaalada Hargeysa ka dhigaysa 4 qof oo si gaar gaar ah loogu dilay magaalada gudaheeda.
Taliyaha ciidinka booliska oo warbixin ka bixinaya sida ay dilalkaasi u dhaceen ayaa sheegay in shalay nin dhalinyaro ah lagu dilay hotel uu wax ka cunay ka dibna uu lacagtii bixinwaayey sidaas darteedna la is afdhaafay oo nin ka mid ah shaqalahii hotelku uu mindi ku dhuftay halkaasna uu ku dhintay.
Halka nin kalana lagu dilay magaalada dhexdheeda isagoo qaad iibinaya ay laba tuug u yimaadeen ka dibna markuu qaadkii u diiday ay isagana mindi ku dhufteen halkaasna uu ku dhintay.
Halka habeenkii xalay ay xafladii ka dhacaysay hotelka Xamdi ee bariga Hargeysa oo lagu soo dhoweynayey sanadka cusub ka dibna uu buuq ka dhashay markii meesha dhalinyaro badani soo jiidhay oo ay cidhiidhinoqotay halkaasi oo nin ka mid ah ilaaladii hotelku uu xabad riday nasiib darana ay xabadaasi ku dhacday gabadh xaflada joogtay oo halkaas ku geeriyootay.
Halka qofka afraadna uu dhintay maanta ka dib markii xaafada isha boorama ay laba dhalinyaro ah oo jaar ahi dagaalameen oo mindi mid la geliyay oo uu isna geeriyooday.
Dadka Hargeysa ku dhaqan ayaa aad uga werwersan dilalkan farahabadan ee aan magaalada looga baran oo hadana mudo aad u gaaban oo isku dhow ka dhacay magaalada. Dhinaca kale dadku waxay aad uga biyodiideen cafiskii uu madaxweyne Rayaale bishii October uu ku saamaxay tuugtii khatarta ku haysay magaalada oo xabsiyada laga soo daayey oo hada cabsiweyn ku abuurtay magaalada oo xataa habeenkii guriyaha ay dadka ugu soo dhacayaan iyagoo mindiyo iyo faasas sita.
