Somaliland oo Cambaaraysay Weerarada Xasuuq ah ee Yuhuuddu ku Hayso Falastiin
Hargeysa (Jam)- Xukuumadda Somaliland ayaa cambaaraysay xasuuqa arxan-darrada ah ee dawladda Israa’iil ku hayso shacabka degan Gacanka Qaza.
Wasiirka Diinta iyo Awqaafta Sheekh Maxamuud Suufi Muxumed iyo Agaasimaha Guud ee Wasaaradaasi Sheekh Maxamed Axmed Cali oo shalay shir jaraa’id ku qabtay xarunta Wasaaradaas, waxay si kulul u cambaareeyeen weerarka xasuuqa ah ee Israa’iil ku hayso shacabka Falastiiniyiinta ah ee aanay jirin wax dambi ah oo ay galabsadeen, iyaga oo weerarkaas ku tilmaamay mid ka baxsan bini’aadaminada
Wasiirka Diinta iyo Awqaafta Sheekh Muxumed Suufi Muxumed oo ugu horreyn shirkaa jaraa’id ka hadlay, ayaa sheegay in shacabka Somaliland ay aad uga xunyihiin waxa ka socda Qaza, isla markaana aanay weligood tiiraanyada muslimiinta la laynayo iloobi doonin.
“Dhibaatada iyo xasuuqa lagu hayo dadka masaakiinta muslimiinta ah ee Qaza jooga aad baanu uga xunahay, ugana xanuusanaynaa sida caalamka kaleba uga xunyahay, sidoo kalena waanu xambaaraynaynaa dhibtaa lagu hayo dadka ee weliba la iska dhego-tirayo wax allaale wixii caalamaka qaylo ka yeedhaysa. Xasuuqa Qaza ka socdana tiiraanyadiisa weligii ilaabi mayno. Dadka muslimiinta ahi waa isku mid oo jidh keliya ayey wadaagaan. Waxa meeshaa ka socdaa waa ficil fool xun,” ayuu yidhi Sheekh Maxamuud Suufi.
Wasiirku waxa uu tilmaamay in cadowtinimada Yuhuudu aanay ahayn mid cusub, balse ay weligeed soo jirtay oo Ilaahay hore ummaddiisa muslimiinta ah uga digay, isla markaana loo baahan yahay in dhibtooda laga magangalo Alle, waxaanu yidhi; “Yuhuuda dhibaatadooda Ilaahay baa inoo sheegay oo yidhi 24-kii saacadoodba kuwaa dariiqooda in aan idinka badbaadiyo 17 jeer iga magangala, waana akhriska Suuratul Faatixa shanta salaadood ee faralka ah oo ah 17 rakcadood ah.”
Sheekh Maxamuud Suufi Muxumed waxa geesta uu sheegay in islaamka uu daciifay oo arrintani ay tahay karbaash lagu hayo kadib markii ay khaladaad badan sameeyeen
“Waxa kale oo jira in islaamku aannu sidiisii hore ahayn oo Ilaahay cuquubaynayo oo meel aan meeshiisii ahayn buu hadh ka raadinayaa, markaa waxaannu Ilaahay ka baryeynaa cadowga sidaa u galaya iyaga uu dhibtooda ku celiyo,” ayuu hadalkiisa ku soo gebogabeeyey Wasiirka Diinta iyo Awqaaftu.
Agaasimaha Guud ee Wasaaradda Diinta iyo Awqaafta Sh. Maxamed Axmed Cali oo isna shirkaa jaraa’id ka hadlay, ayaa sheegay inay ku amrayaan iimaamyada dhammaan masaajidada dalka oo dhan inay salaadaha ugu duceeyaan dadka reer Qaza ee xasuuqa lagu hayo.
“Waxaannu imaamyada masaajidada ku wargelinaynaa oo ku amraynaa inay salaadaha dabadooda uga duceeyaan dadkaa Qaza ku nool ee bomb-ka lala dhacayo, si uu Ilaahay waxaa uga dulqaado, Yuhuuduna cadowga islaamka ayey weligeedba ahayde uu Ilaahay hoojiyo oo halkeeda ku celiyo,” ayuu yidhi Agaasimaha Guud Sheekh Maxamed Axmed Cali.