By Somalimirror on 25 Mar, 2009 10:35 AM in Main, Wararka
Xisbiga Islaamiga Soomaaliyeed iyo Xarakatu Shabaab Al-Mujaahidiin ayaa Maamul Cusub oo wada jir ah u dhisay Magaalda Garbahaarey ee Gobolka Gedo waxaana gudoomiye looga dhigay Max’ed C/laahi Xaashi oo horey u ahaan jiray Gudoomiyihii Magaalada Garbahaarey ee Gobolka Gedo.Afhayeenka Xisbul islaam ee Gobolka Gedo Farxaan Cabdi Cilmooge oo ka warbixinayey Magacaabista Maamulkan Wada jirka ah ayaa yiri”waxaa noo soora gashay anaga oo ah Xisbul Islaam iyo Ururka Al-shabaab inaan Gobolka gedo Degmadiisa Garbahaarey ee Magaala Madaxda Gobolka ah, u dhisno Maamul Cusub oo Islaami ah Insha Allahu Tacaalaa Anagoo u sii socona in aan Degmooyinka kale oo sii xigana aan sii dhisi doono Bi’idnilaahi Kariim.”
Mar wax laga weydiiyey Farxaan Cilmooge Sababaha ay u doorteen Gudoomiyahan Cusub waxa u ku Jawaabay:”Gudoomiyaha Shacabkaa iska leh waana Gudoomiye Shacab waa Gudoomiyaha Degmada, anaga waxaan suuro gelinay in aan si wadajir ah u dhisno Dadkaasi shacabka Muslimiinta ah si loo helo Dacwo Mideysan, si loo helo umadii Dacwada loo sheegayey Midnimadeeda iyo wanaageeda iyo Sharafkeeda iyo tafaraaruq la’aanteeda waxaas oo dhan baa ilaalineynay, laakiin qolo kastaaba Heykal keedii Madaxdeedii iyo Nidaamkeedii bey ku timid.”
Farxaan Cilmooge oo sidoo kale wax laga weydiiyey Arinta ku saabsan Go,itaankii Yuusuf Indhacade uu ka go,ay Xisbigooda iyo waliba hadaladii uu ka dhawaajiyey Yuusuf Indhace ee ahaa ku dhawaaqida Hogaan u gooni ah waxa uu ku jawaabay Cilmooge:”Xisbul Islaam Gudoomiyihiisa waa la yaqaanaa waa Dr. Cumar Iimaan Abuubakar , marka Gudoomiyaal Cusub oo lagu Dhawaaqayna Maanan Maqal, marka Meeshii lagu soo dhisayna Wey ogyihiin Warbaahinta Dhamaanteed.”
Maamulkan Cusub ee sida waa jirka ah loogu sameeyey Degmada Garbahaarey ee Gobolka Gedo ayaa noqonaya kii ugu horeeyey ee si wada jira ah u dhisaan Xisbul Islaam iyo Xarakadda Al-Shabaab, waxayna arintani Muujinaysaa xiriirka iijaabiga ah ee ka dhaxeeya labadaasi dhinac.
