Friday, July 10 @ 13:53:05 EDT
Sheekh Maxamed Cabdi Umal oo kamid ah culumaa u diinka Soomaaliyeed kuwooda ugu caansan ee ku nool dalka Kenya ayaa ka hadlay xaaladda dalka Somalia hadda uu marayo iyo marxaladaha isbadbadalka badan ee dalka uu ku jiro.
Isagoo ka hadlayey Masaajidka weyn ee ku yaalla 6 street ee bartamaha xaafadda Islii ee magaalada Nairobi Salaadii Jimcaha ee maanta ayuu Sheekh Maxamed Cabdi Umal sheegay in kooxaha ku dagaalamayo Somalia, gaar ahaan kuwa Islaamiyiinta ah ay ku mashquulsan yihiin arrimo yar oo aan loo baahneyn in xilligan laga fekirayo, isagoo intaas ku daray in la baneystay sida uu yiri dhiigga qofka muslimka ah.
''Waxaa lagu mashquulsan yahay gabar Xijaab loo saarayo oo la leeyahay cawradaada asturo iyo dad la leeyahay waxaas sameeya, dhammaan waxaas oo dhan wax ka weyn ayaa meesha yaalla oo ah in dalkii uu burbursan yahay, war yaa kuu dirsaday in dadka aad adigu wax farto, adiga is xisaabi naftaada, marka hore, khiyaamaha adiga ayuu Alle kula xisaabatamayaa'', ayuu yiri Sheekh Maxamed Cabdi Umal oo dhanka kale ka digay in si khalad ah loo daadiyo dhiig qofka muslim ah oo aan dambi galin.
Sheekh Maxamed Cabdi Umal oo ah wadaad si weyn diinta u yaqaana oo Nairobi degan ayaa kamid ahaa culumadii horaantii sanadkan magaalada Muqdisho u tagay si ay u dhex-dhexaadiyaan dowladda iyo kooxaha ka soo horjeeda.
Cabdicasiis Saadaam
Nairobi.
