Taliyihii Ciidamada Boliiska Maamul Goboleedka Puntland oo xalay isku dilay gudaha Magaalada Garoowe ee Xarunta Maamulkaasi.
Posted: 8/6/2009 2:04:00 PM
Shabelle: GAROOWE
Abaaro Sagaalkii fiidnimo ee xalay ayaa waxaa magaalada Garoowe ee Xarunta Maamulka Puntland isku dilay korneel Muuse Juquraafi oo ahaa Taliyihii guud ee ciidanka Boliiska ee Puntland.
Mar qura ayaa Magaalada Garoowe waxaa laga maqlay dhawaqa gaadiidka gurmadka deg deg ah ee Ambalasta loo yaqaan taasoo la sheegay in ay siday Meydka Taliyaha Ciidamada Boliiska ee Maamulka Puntland.
Taliyaha oo Mudooyinkii ugu dambeeyay la sheegay in xanuun dhinaca maskaxda ah uu hayay ayaa waxaa la sheegay in uu isku toogtay Bastoolad uu heystay taasoo keentay in dhaawac ahaan loola soo cararo isbitaal Gaar loo leeyahay oo ku yaala Magaalada Garoowe kadibna la xaqiijiyay in uu geeriyooday.
Gudoomayaha gobolka Nugaal Cabdi Xirsi Cali ayaa waxaa uu warbaahinta u sheegay in uu is dilay Taliyihii ciidamada Booliska ee Maamul Goboleedka Puntland,waxaana xiligaasi kadib meydka Taliyaha loo qaaday Isbitaalka weyn ee Magaalada Garoowe.
Wariye Sooyaal oo ka mid ah wariyayaasha ka howlgala Magaalada Garoowe ee Maamul Goboleedka Puntland ayaa waxaa uu sheegay in meydka taliyaha saakay lagu aasay Magaalada Garoowe iyadoo aaskiisana uu ka qeyb galay Madaxweynaha Maamul Goboleedka Puntland.
yesterday assasination,today suicide.
