Hargeysa(AllPuntland)- Hogaamiyaasha Maamulka Gobalada Waqooyi Galbeed ee dalka Soomaaliya ayaa walaac balaaran ka muujinaya xaaladaha waqtigan ka taagan gobalada Sool iyo Cayn, kuwaas oo ku aadan arrimaha ka soo baxay shirkii magaalada Nayrobi ee xarunta dalka Kenya iyo arrimaha lugu dhaqaaqayo ee ka soo horjeeda mawqifka Somaliland.
Faysal Cali Waraabe oo ah mucaaradka Daahir Riyaale kaahin ayaa wax laga walaaco ku sifeeyey talaabadii lugu sheegay in garoon diyaaradeed laga asaasayo Magaalada Buuhoodle, kaas oo lugu wadayo dagaalada looga soo horjeedo maamulka la baxay Somaliland, isagoo sheegay in ay qatar garoonkaasi ku yahay Somaliland, waa sida uu hadalka udhigaye.
" Hadii aan laga hortagin Garoonkaas, waxaa laga maarmaan in ay shaqada iskaga tagaan Daahir Rayaale iyo Kooxdiisa, maadaama uu Cadow soo galay Somaliland, oo la bilaabay in garoomo laga dhisto" Ayuu yiri Faysal Cali Waraabe oo ka hadlayay magaalada Hargeysa.
Wargeysyada magaalada Hargyesa ka soo baxa ayaa todobaadyadii ugu dambeeyey lugu daabacay warar ku saabsan shirkii ku soo dhamaaday dalka Kenya, kaasoo ay ku kulmeen Siyaasiin, Waxgarad iyo Aqoon-yahano loogana hadlay xaaladaha qalafsan ee ka taagan Sool iyo Cayn, gaar ahaana sidii looga saari lahaa ciidamada mudada gacanta ku hayay magaalada Laascaanood ee xarunta gobalka Sool, ayadoo Siyaasiinta Maamulka Somaliland ay walaac ku aadan dhismaha garoonkaasi.
Garoonka ay ka hadlayaan Madaxda maamulka la baxay Somaliland ayaa la xaqiijiyey, in dhismihiisu yahay mid aan waqtigan dhaweyn, isla markaasna ay bilaabeen Dad isku xilqaamay dhismaha garoonkaas, ayagoo lasheegay in ay lug ku leeyihiin Siyaasiin udhalatay gobalka Cayn ee Puntland.
Muran dhuleedka udhaxeeya Maamulka la baxay Somaliland iyo Dawladda Puntland ee Soomaaliya ayaa soo badanayay hadal heyntiisu mudooyinkii ugu dambeeyey, waxaana dhinacyada laga dareemay saan-saan colaadeed oo ku aadan xaaladaha magaalada Laascaanood oo laga qabsaday dawladda Puntland 15-Octobar-2008-dii.
F. C. Maxamed
AllPuntland