Ciidamadada culumaa’udiinka Ahlu Sunna ee degmada Caabudwaaq ayaa dhuulo tus ciidan maanta ku soo bandhigay Xaafadaha degmada Caabudwaaq ee gobolka Galgaduud.
Iyadoo maalintii shalay uu u soo gaba gaboobay tababar mudo socday askar ka tirsan Ahlu Sunna Waljamaaca gaar ahaan kuwa degmada Caabudwaaq oo ay ku qaadanayeen xerada Balli Soomaali ee Bariga Magaaladaasi ayaa maanta ciidamadaasi waxaa xarunta Maamulka ee degmada Caabudwaaq loogu qeybiyay darees u gooniya oo ay kaga duwanyihiin dadka shacabka ah.
Ciidamada oo gaadiid badan watay ayaa waxaa lagu soo daadiyay Magaalada Waxaana ay sameeyeen howlgalo u muuqday in ay ahaayeen dhoolo tus iyagoo watay gaadiid dagaal oo ay ka soo qaateen halka ay tababarka ku soo qaateen.
Ciidamada ayaa sidoo kale socod iyo howlgalo waxaa ay ka sameeyeen gudaha Magaalada,Xaafadaha iyo wadooyinka soo gala iyagoo muujinayay in xiligaan wixii ka dambeeyay ay leeyihiin darees gooni ah islamarkaana dadku ay ku aqoonsadaan.
Gudoomiye ku xigeenka Maamulka Ahlu Sunna ahna ku simaha gudoomiyaha Ahlu Sunna Sheekh Burhaan C/laahi Jaamac oo goobta ka hadlayay ayaa waxaa uu sheegay in dareeska Ciidamadaan loo sameeyay ay ula jeedaan sidii dadku ay u kala aqoonsan lahaayeen ciidamada Maamulka Ahlu Sunna ee degmada Caabudwaaq,isagoo intaasi ku daray in ciidamadaani ay ka shaqeynayaan amaanka guud ee degmada Caabudwaaq.
Ciidamada maamulka Nabad galyada ayaa intii la sameeyay waxa ay deegaankaasi ka qabteen howlo muhiim ah,waxa ay isku fureen Shacbigii mudo kala xirnaa,waxa ay sidoo kale ay baneeyeen Wadooyin xirnaa tan iyo intii ay burburtay dowladii dhexe kuwaasoo si toos ah haatan ay u adeegsadaan shacbka iyo ganacsatada islamarkaana ay ku xaroodaan gaadiidka.
Waxaa sidoo kale ka warbixiyay waxyaabaha ay qabteen mudada ay jireen Ciidamada Maamulka nabad gelyada ee Ahlu Sunna Waljamaaca degmada Cabudqaaq taliyaha Ciidamada amniga Sheekh Cali Dheere,isagoo sheegay in haatan wixii ka danbeeya in Ciidamadu ay ka shaqayn doonaan danta dad waynaha iyo deegaanka.
