Madaxweynayaashii isku hayay maamulka Goboleedka Galmudug oo maanta ka heshiiyay khilaaf muddo dheer soo jiitamayay
Isniin, December 28, 2009(HOL): Kulan lagu soo afjaray khilaaf u dhaxeeyay Madaxweynayaasha maamulka Galmudug ee Koonfurta Gaalkacyo ayaa maanta ka dhacay Magaalada Muqdisho iyadoo mid ka mid ah mas'uuliyiintaas uu ka tanaasulay xilkiisii.
Xafladdan oo ka dhacday Hotel Saxafi ayaa waxaa goobjoog ka ahaa wasiirro ka socda Dowladda Soomaaliya, xildhibaanno iyo weliba marti-sharaf kale, iyadoo khilaafkan la sheegay inuu xallintiisa ka shaqeeyay Madaxweynaha Soomaaliya Sheekh Shariif Sheekh Axmed.
Axmed-shariif Cali Hilowle oo ka mid ahaa madaxweynayaasha isku hayay maamulka Galmudug ayaa ku dhawaaqay inuu u tanaasulay mas'uulkii ay xilka isku hayeen oo lagu magacaabo Col. Axmed Max'ed Caalin.
"Anigoo u daneynaya shacabka ku nool Galmudug ayaan go'aansaday in tanaasul aan sameeyo si ay dadkaas u helaan nabad, waxaana iga go'an inaan la shaqeeyo walaalkey aan uga tanaasulay xilka" ayuu yiri Axmed-shariif Cali Hilowle.
Madaxweynaha Soomaaliya Sheekh Shariif Sheekh Axmed ayaa lagu ammaanay inuu ka shaqeeyay heshiiska labadan mas'uul dhexmaray iyo tanaasulka uu sameeyay mid ka mid ah labada mas'uul ee isku hayay xilka.
"Walaalkey waa ku mahadsan yahay sida qiimaha badan ee uu iigu tanaasulay, waxaana kala tashan doonaa wixii waayo-aragnimo ah ee uu i dheer yahay" ayuu yiri Col. Axmed Max'ed Caalin oo ah madaxweynaha xilka looga tanaasulay.
Gen. Cabdi Qaybdiid oo ah wasiirka Macdanta iyo Biyaha oo kulanka goobjoog ka ahaa ayaa sheegay inuu ku faraxsan yahay tanaasulka uu sameeyay Axmed Shariif uuna kaga mahadcelinayo.
Sidoo kale Axmed C/salaan Xaaji Aadan oo isaguna ka mid ahaa xubnihii lagu marti-qaaday shirkaas ayaa mahad u celiyay labada mas'uul ee muddada dheer isku hayay xilka isagoo sheegay inay labada mas'uul si wadajir ah u shaqeeyaan.
It is not in the interest of galmudugese people to kill each other for power.
