Kooxo hubeysan oo ku dilay Degmada Buur-hakaba ee G/Bay askari la sheegay inuu ka goostay Dowladda Soomaaliya
Sabti, Mar 20, 2010 (HOL) - Kooxo hubeysan ayaa xalay ku dilay degmada Buur-hakaba ee Gobolka Bay askari ka goostay Dowladda Soomaaliya iyadoo kooxihii ka dabmeeyay dilkiisa ay baxsadeen.
Goobjoogayaal ay qaraabo ahaayeen ninka la dilay oo ku sugan degmada Buur-hakaba ee Gobolka Bay ayaa u sheegay HOL in dilkan uu dhacay xalay fiidkii kooxaha geystayna aan la garanayn.
"Askarigu wuxuu ahaa mid kasoo goostay Dowladda maamulka degmada ka jirana lama socon inuu ku sugan yahay degmada, waxaana toogtay koox ku hubeysan bastoolado, kuwaasoo baxsaday markii ay dileen" ayuu yiri ruux ay ehel yihiin askariga la dilay, kaasoo ka gaabsaday magaciisa inuu sheego.
Dowladda Soomaaliya ayaan ka hadlin dilka Askarigan loogu geystay degmada Buur-hakaba ee Gobolka Bay iyo inuu ka tirsanaa ciidamadooda, kana goostay, waxaase jirtay in ciidamo badan ay ka goosteen Dowladda Soomaaliya tan iyo markii la unkay.
Maamulka Xisbul Islaam ee degmada Buurhakaba ayaa sheegay inay baadigoob ku hayaan kooxihii ka dambeeyay dilka askarigan, waxaana mas'uul u hadlay maamulka Degmadaas uu sheegay inaysan la socon askariga soo goostay.
"Haddii askari uu soo goosto kuna soona gaaro goobaha ay ku sugan yihiin kooxaha dowladda ka horjeeda waa inuu isi soo diiwaangeliyaa si loola socdo ammaankiisa" ayuu yiri sakaal diiday inuu magaciisa sheego oo ka mid ah Madaxda Buur-hakaba.
Dilkan ayaa noqonaya kii ugu horreeyay oo loo geysto askari ka goostay Dowladda Soomaaliya, kaasoo ku biiray dhinacyada dowladda ka horjeeda, waxaana sidoo kale jira ciidamo ka tirsan kooxaha Islaamiyiinta ah oo u goosta dhanka Dowladda.
Maxamed Xaaji Xuseen, Hiiraan Online
maxuseen@hiiraan.com
Muqdisho, Soomaaliya
