Ardayda Isu Diyaarinaysa Imtixaanka Kama Danbaysta ah (Form Four ) ee Dugsiga Sare ee Al-Furqaan oo Xaflad Qabsaday + Sawiro
Badhan : Ardayda dugsiga sare ee Al-furqaan ee isu diyaarinaysa imtixaanka dugsiga sare ay kaga qalin jebinayaan ayaa xaflad isugu jirtay qado sharaf iyo kulan ballaadhan ku qabsaday xarunta dugsiga qaybtiisa H/dhexe maalinamadii Arbacada.
Ardaydan oo noqonaysa dafcaddii 5aad ee ka qalin jebisa dugsiga sare ee Al-Furqaan ayaa ah tiradii ugu badnayd ee dugsiga ka qalin jebisa tan iyo markii la asaasay 1997-kii. Ardaydan oo dareenkooda wadan jacayl muujinayey ayaa waxay ku gaaddeysnaayeen calanka buluugga ah ee Soomaaliyeed , waxayna si wada jir ah hoolka xafladdu ka dhacday uga wada qaadeen heestii " Soomaaliyey Toosoo " oo dadkii qiiro wadaniyadeed ku abuurtay.
Xafladdan ayaa waxa kasoo qayb galay maamulka dugsiga, bareyaal ka socdey dugsiyada kale , waalidiintooda , xubno ka mid ah qurbe joogta , culimaa'udiin uu ugu muhiimsanaa Shiikh Faysal Xuseen Mire iyo Shiikh Cabdixayi Aw-Muuse, aqoon yahan kale iyo arday ka socotey dugsiyada sare ee magaalada qaarkood.
Maxamuud Cabdi Maxamed oo ku hadlay magaca ardayda ayaa waalidiinta iyo bareyaasha ka codsaday iney guul ugu duceeyaan , sidoo kalena ballan qaaday iney waxbarashadooda jaamacadeed sii wadan doonaan , wadankana abaalkiisa gudi doonaan haddii ilaahay idmo.
Waxgaradkii halkaas ka hadlay ayaa ardaydaas ku boorriyey in aqoonta ay baranayaan ay ku dhaqmaan, kuna darsadaan edeb iyo akhlaaq, maadaama aan aqooni waxba tarayn haddii aan qiyam iyo akhlaaqi jirin , sidoo kale waxay ku dhiirri geliyeen dulqaadka dhibta waxbarashada iyo joogtaynteedaba.
Waxa fursad ka qayb gal khadka telefoonka ah la siiyey Faa'iso C/laahi Maxamed oo ka mid ahayd ardaydii sanadihii hore ka qalin jebisey dugsiga Al-Furqaan, haddana Jaamacadda Al-Axfaad ee dalka Suudaan ka barata cilmiga dhakhtarnimada ( Medicine ), taasoo u noqotay guubaabo iyo dhiirri gelinba , gaar ahaan gabdhaha oo tiradoodu dhamayd 17 gabdhood.
Dadkii halkaas ka hadlay ayaa waxa ka mid ahaa : Maamulaha iskuulka C/casiis Axmed Saalax , Shiikh Faysal Xuseen Mire , Shiikh Cabdixayi Aw-Muuse, iyo Shiikh Axmed Shiikh Saalax.
http://dhahar.com/article.php?articleid=9239
