Taageerayaasha xisbiga talada haya ee UDUB ayaa maanta maalintii saddexaad olole ka wada gobolada iyo degmooyinka ay ka kooban tahay somaliland, iyada oo caasimada Hargeysana ay soo buux dhaafiyeen fagaaraha beerta xorriyada, iyada oo jidadka ka ag dhawna lagu arkayay kooxo dhalinyaro ah oo isugu jira rag iyo dumar oo kor u lulaya calanka xisbigaas astaanta u ah iyo waliba boodhadh ay ku xardhan yihiin sawirada labada murashax ee jagada madaxweynaha iyo ku xigeenka.
taageerayaasha isugu soo baxay ololaha doorashada oo ay kala qayb galeen Xoghayaha guud ee xisbiga UDUB Jaamac Yaasiin Faarax, Wasiirka Maalliyada, Wasiirka duulista Hawada, masuuliyiin iyo saraakiil sarsare oo ka socotay xisbigaas.
wasiirka Duulista hawada Mud. Cali Maxamed Warancade oo ugu horeyn khudbad u jeediyay taageerayaasha xisbigaas ayaa ka codssday in ay mar kale u codeeyaan murashaxa jadada madaxweyneha Daahir Rayaale Kaahin iyo ku xigeenkiisa waxaanu qaab su´aalo u eeg ka dhigay in ay marka codkooda siiyaan dad weynuhu isaga oo tilmaamay in shan sano oo dambe oo la doorto madaxweyne rayaale ay soo bixi doonto barwaaqadu hadaladiisii ka mid ahaa "Codkeena mar kale daahir Rayaale Kaahin Ma siinaa, nabadgalyadeena ma adkaysanaa, barwaaqada iyo jidka wanaagsan ma ku sugnaa.
insha allah shanta sano ee socota ayay wax waliba inoo hagaagi doonaan, barwaaqaduna way soo socotaa oo daboolka ayaynu ka qaadi doonaa,"
wasiirka ayaa tilmaamay in maalintii shalay ahayd uu dalka ku soo dhaweeyay wafti ka socday dalka Kuwait, kuwaas oo buu yidhi u socday in ay sameeyaan madaarka Berbera, waxaana hadaladiisii ka mid ahaa "Waxa aan shalay dalka ku soo dhaweeyay wafti ka socday dalka Kuwait, kuwaas oo uu soo diray amiirku, waxaanay sheegeen in ay socdeen dhisitaanka madaarka Berbera, ka hargeysa iyo wadada isku xidha Ceerigaabo iyo Burco, waxaanay igu yidhaahdeen waxa aad tihiiin dal aan la ictiraafin laakiin waxa aanu wax idiin siinaynaa qiimaha iyo qaayaha aad leedihiin,"
dhinaca kale waxa iyaguna halkaas ka hadlay xoghayaha guud ee xisbiga UDUB jaamac Yaasiin Faarax oo sheegay in caawa ay soo bandhigi doonaan barnmaamijkooda siyaasadeed ee ay dalka ku hagi doonaan haddii ay dalka ku hagi doonaan hadii ay talada ku guulaystaan, waxa kale o uu xisbiga siyaasiga ah ee KULMIYE ku tilmaamay in uu xidhiidh hoose la leeyahay ururka dunida looga aqoonsan yahay in uu argagaxisada ee xisbul Islaam.
dhinaca kale wasiirka maaliyada xuseen cali ducaale Cawil oo isna halkaas ka hadlay ayaa guddoomiyaha xisbiga Kulmiye ku dhaliilay booqashadii uu dhawaan ku tagay xarunta gobolka Hawd ee Balligubadle, waxaanu tilmaamay in ay magaaladaas ugu dambaysay ka dib markii ay SNM gacanta ku dhigtay guud ahaanba dalika.
si kastaba ha ahaatee labadan masuul ee Wasiirka Maaliyada iyo xogyaha guud ee xisbiga UDUB ayaan nasiib u helin in khudbada ay jeediyeen ay noqoto mid ay dhagaaystaan taageerayaashii ciida badnaa ee ay doonayeen, balse waxa ay ku hambabareen in fagaaraha beerta xorriyada oo daqiiqado ka hor buuxday loo baneeyo ka dib markii ay dadku si raabo raabo ah uga dareereen.
Najax Aadan Cunaaye
Hadhwanaagnews/Office
Hargeysa/Somaliland
Najax@hadhwanaag.org
