August 4, 2010
Maamulka degmada Bosaaso ee xarunta gobolka Bari ayaa waxaa ay shaaca ka qaadeen in ay bilaabayaan talaabooyin ku aadan bixinta kaararka aqoonsiga ee la siinayo dadka degan magaaladda Bosaaso.
Kulan maanta lagu qabtay xarunta Dawladda hoose ee magaaladda Bosaaso ayaa waxaa ka hadlay Kuxigeenka duqa magaaladda C/qaadir Yuusuf Daahir kaas oo sheegay in kaararkaan la siin doono dadka kala duwan ee ku sugan si loo kala saaro dadka oo la kala garto.
Wuxuuna sheegay in arintaan ay qayb ka tahay talaabooyinka lagu xoojinaayo amniga guud ee magaaladda oo ay ka dhacayeen falal amaan darro mudooyinkii lasoo dhaafay.
Kaararkaan aqoonsiga oo ah nooci hore ay bixin jirtay Dawladdi dhexe ee Soomaaliya ayaa qofkii qaadanaaya horta u bixinaaya lacag gaaraysa $8-doolarka maraykanka ama 256-kun oo shilin soomaali ah,hadii kale uusan heli doonin.
Kuxigeenka Duqa ayaa intaas ku daray in shirkad ay gacan ka siin doonto Dawladda hoose bixinta kaararkaan aqoonsiga,wuxuuna ugu baaqay
dhamaan shacabka ku nool magaaladda in ay qaatan kaararkaan isagoo xusay in la bilaabi doona siduu sheegay maalinimada berito.
Kulanka ka dhacay xarunta Dawladda Hoose ayaa waxaa ka qaybgalay masuuliyin kala duwan oo ka tirsan Dawladda Puntland.
Horseed Media
