Abwaan Yusuf Aadan Xuseen Alaale Gabaygiisi DAYACAN

[Mr_Alfaas]

IshaNews-Gabaygan hoos ku qoran waxaa tiriyay Abwaankii caanka ahaa, qaaliga ahaa ee (Yusuf Aadan Xuseen Alaale) Illaahay haw naxariistee,
Markaan Gabaygan soo qaadano waxa uu ku saabsanaa waayaha markaa lagu jiray iyo wixii lasoo maray, Wakhtiga gabaygan uu Abwaanku tiriyay waxay ahayd Shirwaynihii labaad ee lagu doortay Madaxwaynihii Soomaliland (Maxamed Haji Ibraahin Cigaal) Illaah haw naxariistee, Dhankale markaan ka eegno Abwaanku waxa uu ka soo jeedaa qoys ay suugantu hodan ku tahay, sida
Cismaan Adan Xuseen, (Cismaan Askari), Axmed Adan Xuseen (Ahmed Masri), iyo Xassan (Ambessy) .


Part One/Qaybti Kowaad.

Maansadii: DAYACAN

1. Dayacan adigoo dayacan
2. Wax wayn oo kula dayacan
3. Bal aan kaa daadejee
4. Digtoonee aragtidaa
5. Dugaagga kullaa ishaa
6. Dumaa ku dhis sheekadaa
7. Kolkay raggu diir noqdaan
8. Haweenkuna dulin noqdaan
9. Dunuub badanina dhacaan
10. Dabayluhu way rogmaan
11. Xooluhu dulin bay noqdaan
12. Ammaano la doonayniyo
13. Xaaraan deyn iyo dan guud
14. Duuduub baa lagu liqaa
15. Intay dibirtay dihdaan
16. Hudheelada duurka iyo
17. Gaadiidka dushiisa iyo
18. Guryaha dabadooda iyo
19. Dixday wada seexataa
20. Dooxay wada jiifsataa
21. Gadhkaa la is wada daraa
22. Jawab daran baa timaad
23. Duul baasina way kacaan
24. Diiniyo dimuqraadi iyo
25. Digtaytarro way murmaan
26. Ganaax loo soo diriyo
27. Cadhana way soo degtaa
28. Qabyaaladdu daabaciyo
29. Durkaba way kaa hishaa
30. Qoomiyaddey duudsidaa
31. Qarankay kala dirtaa
32. Aqoontay kala dirtaa
33. Dushay iska wada nacdaa
34. Hoostay iska wada dishaa
35. Damaacigu wuu kordhaa
36. Daan daansigu wuu bataa
37. Dagaalana way qarxaan
38. Duufaan way kugu noqdaan
39. Adduunyadu way diddaa
40. Intay is dishay degtaa
41. Dibbay u fadhiisataa
42. Dabkay kala qaadataa
43. Danbay isu kaashataa
44. Wixii dumay bay dhitaan
45. Wixii dilay way gartaan
46. Daw bay isu weheshadaan
47. Aqoonta dunuunucdaa
48 Wixii dhacay daabacdoo
49. Duruustaa lagu bartaa
50. Digtooni si looga helo

Gabayga uu abwaanku tiriyey oo aad u dheer ayaanu oogu talo galnay in aanu qaybo kala duduwan aanu u qaybinno oo aanu maalinba in aanu idiin soo gudbino .

Waxa nasoo gaadhsiiyey gabaygan qaaliga ah Mud Maxamuud Jaamac.

IshaNews Media Group.

Hargeysa Somaliland.

[Dhaga Bacayl]

Yusuf alaale the brother of Cismaan Askari ILAHAY ha naxariistee was one of the best ever. How could you top ARLIYO and CILMI IYO CAADO?