Inta badan dhalinyarada ayaa ka hor doorashadii dalka ka dhacday waxa ay isku maaweelin jireen in isbedel ka dhaca dalku uu yahay ka keliya ee ka badbaadin kara dhalinyarada camal la’aanta baahsan ee dalka ku habsatay.
Farxad iyo rayn-rayn ayay dhamaanba dhalinyarada dalka u ahayd markii xisbiga Kulmiye oo isagu wakhtigii ololaha balan qaadi jiray in ay camal u samayn doonaan dhalinta hoganaysa meelaha la isugu yimaado kuwaas oo marka uu waagu baryo ilaa gabal dhaca wakhtiga isku dhaafiya.
Xukuumada cusub iyo dhalinyarada reer Somaliland oo ah xoogii dalka ayaa kala tirsanayo xaq iyo xuquuq ku kala maqan, waxaanay dhalintu isu geysteen xisaab haddii markii ololaha lagu jiray ay ahayd sax, hadda isu geyntoodu ay soo baxayso Eber.
“Walaalo horta nin waliba dantiisa ayuu wadaa, maanta haddii aad wasaaradaha tagto oo aad CV –gaaga geyso waxa markaaba la isweydiinayaa waa reer ayo, laakiin lama eegayo aqoontaada, taas ayaanu islahayn waa laga soo gudbay ee dib ayay u soo cusboonaatay” ayuu yidhi Farxaan Ducaale.
Waxaanu intaasi ku daray isla markaana uu quus iyo faro madhnaan ka muujiyay balamihii wakhtigii olalaha doorashada lagu jiray “Waxa aan durba dareen wayn ka qabnaa in xisbigii aanu u riyaaqaynay wakhtigii ololaha doorashada ee aanu hadh iyo habeenba heeganka ugu jirnay in aanu dhaafino filkii uu durba dabada noo soo jeediyay” ayuu yidhi
Maaha wakhti laga qayliyo fullinta balamo ay hore u qaaday xukuumadan cusubi wakhtigii ay ololaha doorashada ku jirtay, hadaba aan dib ugu noqdo Farxaan oo ay wakhtigaas ka muuqatay cadho aad u wayni isla markaana aan xasuusiyo in uu ku degdegay helitaanka camal iyada oo aanay weli xukuumadu afartankii ka bixin “Maaha walaalo wax walba ifafaalihiisa ayaad arkaysaa, markaa ilama aha in aan degdegay waxaana fekerkaygan ila qaba dhamaanba filkay, haddii ay wax isbedelaan waynu u wada joognaa laakiin walaahi yaab ayaa naga soo dhego wayn, haddii ay sida ay hada u wax wado ay sii ahaatana fartayadii ilaahay nama jarin ee inta aanu ku bedelno ayaanu mid kale oo khayr qaba saari doonaa” ayuu yidhi.
Haddii wakhtiyadii hore dalka Somaliland u shaqayn jiray qorigu, hada waa la tiiriyay, waxaana la isku raacay in dhuunyaale ku dhalay qorigii ay ka dhici jirtay baaruudu, balse taa bedelkeeda waxa Somaliland maanta ka shaqaynaysa in xukuumad dhan oo dhisan loogu hanjabayo in far wax lagaga qaban doono.
Dhinaca kale waxa soo baxaysay in xukuumadan cusub ay xididada u siibaysay maalmihii ugu dambeeyay dadkii shaqaale hoosaadka ka ahaa dhamaanba hay’adaha waxaana la tilmaamay in ay arrintaasi tahay mid cawaaqib xumo keeni karta.
Madaxweyne ku xigeenkii hore ee Somaliland Mud. Axmed Yuusuf Yaasiin ayaa mar sii horeysay ku canaantay xukuumadda in ay xiddidada u wada siibto dhamaanba shaqaalihii dawlada, waxaanu u soo jeediyay in haddii ay dalka ku guulaysteen aanay ku tacadiyin shaqaalaha oo ay iska daayaan caruurahooda ha u xoogsadaan ileen iyaguba dalka xaq bay ku leeyihiin.
Xukuuda madaxweyne siilaanyo oo hadda aanay u dhamaanin boqolkii maalmood ee ugu horeeyay wakhtigeedu ayaa la sheegaa in ay wax la taaban karo qabatay, balse waxa taa barbar socoto in shanta sanno ee socota looga fadhiyo fullinta balanqaadyadeedii iyada oo maanka ku haysa wiixi tii hore lagu eryay iyaduna ay ku ceebaynaysay.
Najax Aadan Cunaaye
Hadhwanaagnews/Office
Hargeysa/Somaliland
Najax@hadhwanaag.org
Tell: 9181187
waata dawlad ku sheegi somaliland
