Hargeysa (Ishanews) Suldaanka guud ee beesha Ayuub Suldaan Daahir Suldaan Aamin iyo Boqorka Beeshaasi Boqor Cali Xuseen Kaahin ayaa soo saaray baaq ay ku dhaleecaynayaan Sadkii uu Madaxweyne Siilaanyo beeshooda ka siiyay xilalka Xukuumaddiisa isla markaana waxa ay uga digeen inuu ku talaabsado inuu xilka ka qaado safiirka Itoobiya u fadhiya Somaliland Maxamed Xasan Siciid oo ka soo jeeda Beeshooda, taasoo ay ku tilmaameen inay tahay hadii ay dhabawdo inuu xilka ka qaado inay la cuslaan doonto madaxweyne siiranyo .
Baaqaas ay soo saareen Madax-dhaqameedka Beesha Ayuubna waxa uu u dhignaa sidan “ hadaanu nahay Beesha Sayla Bari waxaanu jawaab waafiya ka bixin doonaa haddii ay dhabawdo badalka Safiirka Ethopia u fadhiya Somaliland
Sida umada reer Somaliland markhaatiga ka tahay waxa beesha Sayla bari ku gaadhay xusul-duubkii loogu jiray isbedela nabad badan, waxaanay Filaysay in Xukuumadda maanta jirtaa noqoto mid dhayda hadimooyinkii ka soo gaadhay wakhtigii dedaalka loogu jiray isbedelka balse taa digeed ay xukuumadan uu Madaxweynaha ka yahay Siilaanyo ay Sad uga dhigtay qadin aan hore taariikhda Beesha u soo marin.
Inkasta oo ay yar iyo weyn beesha Sayla bari ka xumaatay qadinta uu ula badheedhay Madaxweyne Siilaanyo hadana waxgaradka beeshu wuxuu ka xishooday inuu si cad u dhaleeceeyo ka been sheegista uu Madaxweynuhu ka been sheegay xarfaha ku qoran buuggii midabka fiicnaa ee dadka iyo dalka lagu Beer-laxawsanayay iyo balan-qaadyadii hal ku dhega looga dhigayay Sinaanta iyo Cadaalada.
Si kastaba ha ahaatee iyadoo beeshii ugu horeysay ee uu Madaxweyne Siilaanyo kula dul kufo cadaalad daradu ay noqotay beeshii Hiilka ugu wey siisay wakhtigii uu xusl-duubka ugu jiray hogaanka Dalka, iyada oo aanu waliba Garawshiiyo ka bixin waxa hadana fajac iyo amakaag nagu noqotay in xilkii yaraa ee aanu ka xishoonay inaa saluugno markii horeba uu hadana yidhaa waan la noqday.
Run ahaantii waxaan u sheegaynaa Madaxweynaha haddii ay arrintani la fududahay inay la cuslaan doonto, waxaanan u sheegaynaa in arrintiisani tahay habartii tidhi dhulow kaama kaco.
Waxaan leenahay haddii aad ka xishoon weyday, damiirkaaguna kuu diidi waayay inaad beesha Sayla Bari Sad-quudhsigii ugu darto Duco qabe, anana waxaanu ilaabi doonaa wixii aan xeerinaynay”.
Mahadsanidin
Suldaanka Guud ee Beesha Ayuub Boqorka Beesha Ayuub
Suldaan Daahir Suldaan Aamin Boqor Cali Xuseen Kaahin
C/raxman Osman C/laahi (Isbatore)
Ishanews Media Group
Email. expensiveman_10@hotmail.com
