SomaliNet Forums

Gaalkacyo:Wafti kasocda DFKMG ah oo si diiran Gaalkacyo loogu soo dhaweeyey.

Gaalkacyo:(Allpuntland)-Waxaa Maanta si diiranMagaalada Gaalkacyo ee Xarunta gobolka Mudug loogu soo dhaweeyey Wafti ka socda Dawlada Federaalka ee Soomaaliya oo uu horkacayey Ra’iisul Wasaare xigeen Ahna Wasiirka Wasaarada Qorsheynta & Xiriirka Caalamiga ah ayna kamidyihiin Wasiirka Arimaha Gudaha & Amniga qaranka & ku dhawaad 10-Xildhibaan oo kasoo kalajeeda Puntland & Galmudug.

Waftigan ayaa soo dhaweyntooda ka qeybqaatay Maamulada ka kalakira Koonfurta & Waqooyiga Gaalkacyo ee Puntland & Galmudug,waxaanaa ay imaanshahoodii kadib gaareen Koonfurta Magaalada Gaalkacyo oo ay kula kulmeen Madaxda Galmudug iyagoo dabadeedna soo gaaray dhanka Waqooyi ee Magaalada oo looga sameeyey Xarun ay dagaan inta ay gaalkacyo joogaan.

Waftigan ayaa ah kuwii ugu horeeyey ee Gobolada dalka u safra kuwaas oo kamid ah Golaha Xukuumada Cusub ee Soomaaliya,waxaana ay Waftigani Gaalkacyo u yimaadeen dejinta Colaad ka oogan Dhinacayada Waqooyiga & Koonfurta Gaalkacyo.

Cabdiqani Xayir
Allpuntland

Gaalkacyo:”Dadka Reer Gaalkacyo waa inay Hubka dhigaan kuna noqdaan Nabadii lagu yaqaanay”R/Wasaare Xigeenka Soomaaliya.

Gaalkacyo:(Allpuntland)-Ra’iisul Wasaare xigeenka Jamhuuriyada Soomaaliya islamarkaasna ah Wasiirka Wasaarada Qorsheynta & Xiriirka Caalamiga ah ee Soomaaliya Prof,Cabdiweli Maxamed Cali oo maanta isaga & Wafti balaaran oo uu horkacayo ay soo gaareen Magaalada Gaalkacyo ee xarunta gobolka Mudug ayaa Dadka reer Gaalkacyo ugu baaqay inay joojiyaan dagaalka dhexdooda ah gaar ahaan Cirifyada Koonfurta & Waqooyiga Gaalkacyo.

Wasiirka Qorsheynta ee Soomaaliya oo caawa Warbaahinta Aqalka Madaxtooyada Puntland ee Gaalkacyo kula hadlayey ayaa sheegey in maanta ay qaateen kulamadii ugu horeeyey oo ku saabsan Dejinta Colaada Mudug,waxaana uu sheegey in ay ku baaqayaan Xabadjoojin Deg deg ah ayna dadka Gaalkacyo dhamaantood ugu yeerayaan inay Nabada qaataan.

“Waxaanu u nimidsidii aanu uga qeybqaadan lahayn Dejinta Colaada Gaalkacyo,taasna bilowgeedii Waanu bilownay,Waxaanu imika shacabka Gaalkacyo dhinac kasta oo ay kajoogaan ugu baaqaynaa inay Hubka Dhigaan ayna ku noqdaan Nabadii ay Caanka ku ahaayeen,Waxaanu amraynaa Xabad joojin deg deg ah”Ayuu yiri Prof,Cabdiweli Maxamed Cali.

Cabdiweli Maxamed Cali Wuxuu sheegey in ay Saacadaha soosocda Kulamo balaaran laqaadan doonaan Maamulada & Odayaasha gobolka Mudug dhinacyadiisa kaladuwan jooga,wuxuuna rajo balaaran ka muujiyey in ay ku guulaystaan Waan waanta Nabdeed ee ay gobolka u yimaadeen.

Cabdiqani Xayir
Allpuntland