Sabti, January 08, 2011(HOL): Xaflad ballaaran oo si weyn la iskugu soo dubada riday oo ka dhacday Jaamacadda UIA ee dalka Malaysia ayaa waxaa lagu soo doortay hogaamiyaha cusub ee ardayda Soomaaliyeed ee waxbarashada u joogta qeybaha kala duwan ee dalka Malaysia.
Xafladaan ayaa waxaa kasoo qeyb gallay dhamaan qeybaha kala duwan ee bulshada Soomaaliyeed ee ku nool dalka Malaysia, kuwaa oo intooda badan ka yimid gobolada uu ka kooban yahay dalka Malaysia, si’ay u doortaan gudoomiyaha cusub ee sanadkaan hogaamin lahaa dhamaan ardayda Soomaaliyeed ee waxbarashada u joogta dalka Malaysia.
Jeekada gudoomiyenimo ayaa waxaa isu soo sharaxay laba xubnood oo wax ka barata Jaamacadda UIA-da, kuwaa oo lagu kala magacaabo C/Salaan Sheekh Maxamed C/llaahi iyo Cabaas C/llaahi Axmed.
Inta aysan doorashada dhicin ayaa waxaa ka hadlay labada musharax ee kala ah C/Salaan Sheekh Maxamed C/llaahi iyo Cabaas C/llaahi Axmed, isla-markaana waxay faallo ka bixiyeen midba midka kale haddii la-doorto waxa uu qaban doono, waxayna labada musharax ay ku dheeraadeen sidii ay kusoo jiidan lahaayeen boqolaalka ruux ee kasoo qeyb gallay xafladani.
Dhawr daqiiqadood kadib ayaa waxaa bilaabatay in guddiga doorashada uu qeybiyo waraaqihii ay ardaydu ku codeyn laheyd, iyadoo ay si habsami leh kusoo idlaatay codeynta, intii gudiga doorashada uu ku mashquulsanaa tirinta codeynta ayaa waxaa barnaamijkaan lagu soo bandhigay Gabayo iyo Geeraaro, waxaana kaalin fir fircooni leh ka qaatay Abwaan Maxamuud Jeeri.
Sidoo kale Sheekh Cabdi Khani oo kamid ahaa marti sharaftii lagu soo casuumay xafladaan ayaa wuxuu masraxa ka jeediyay dhawr aayadood oo Qur’aan ah, isagoo bulshadii halkaasi iskugu timid ugu baaqay in’ay ku dhagnaadaan xariga ALLE, isla-markaana ay muujiyaan Sunada Nebiga “NNKH”.
Dhanka kale Gudiga Doorashada ayaa sheegay in’ay codeeyeen 364 ruux, 363 cod baa la-ansaxiyay, halka hal codna uu halaabay, iyagoo intaasi ku daray in Mudane C/Salaan Sheekh Maxamed C/llaahi uu hellay 210 cod, halka Cabaas C/llaahi Axmed uu isna hellay 153 cod, isla-markaana Gudiga Doorashada ayaa sheegay in C/Salaan Sheekh Maxamed C/llaahi uu yahay gudoomiyaha cusub ee ardayda Soomaaliyeed ee dalka Malaysia, kadib markii uu ka cod batay musharaxii kale ee la-tartarmaayay.
Markii lagu dhawaaqay in C/Salaan Sheekh Maxamed C/llaahi uu yahay gudoomiyaha ardayda Soomaaliyeed ee dalka Malaysia ayaa waxaa dhawaq xoogan isqabsaday hawlkii uu ka soconaayay doorashada, iyadoo taageerayaasha C/Salaan ay muujiyeen dareen aan la’qiyaasi kareyn.
Gudoomiyihii hore ee ardayda Soomaaliyeed ee dalka Malaysia oo xafladani goob joog ka ahaa Cabdalla Axmed Nuur ayaa saxaafadda u sheegay in uu ku faraxsan yahay sida ay doorashada u dhacday, isagoo intaasi ku daray in uu xilka ku wareejin doono gudoomiyaha cusub ee lasoo doortay.
Si kastaba ha-ahaatee doorashadaan oo si-weyn loo-soo agaasimay ayaa waxay kusoo idlaaday sidii loogu talla gallay, iyadoo ardayda Soomaaliyeed ee waxbarashada u joogta dalka Malaysia ay ku qanceen sida wanaagsan ee doorashada u dhacday.
