Wasiirka Arimaha Gudaha Puntland La Kulmay Saraakil sare QM

[FBISOMALIA]

Wasiirka Arrimaha Gudaha, D/hoose & Horumarinta Reer Miyiga Dowlada Puntland Gen: Cabdulaahi Axmed Jaamac (Ilkajiir) oo uu weheliyo Wasiir ku xigeenkiisa Cali Yuusuf Cali (Xoosh) ayaa maanta ku qaabilay Hoteelka Rugsan Square ee Magaalada Garoowe U qaabilsanaha Soomaaliya Hay’adda UNHCR United Nation High Commissioner for Refugee Bruno Geddo.

Dhanka kale waxaa kulankan goob joog ka ahaa Wakiilka Puntland ee Hay’adda UNOCHA Willaim & Madaxa Xafiiska Garowe ee Hay’ada UNHCR Maxamed Saalax ujeedka kulankan ayaa ku saabsanaa Qaxootiga & Barakacayaasha ku nool deegaanada Puntland iyo sidii wax loogu qaban lahaa.

Waxaa waxbadan la iska weydiiyey dhibaatooyinka haysta dadkaas gaar ahaan dhinacayada Arrimaha Bulshada sida Caafimaadka, Waxbarashada, Cuntada, Hoyga & Biyaha iyadoo labada dhinac ay iska weydaarsadeen xogo badan.

Gebagebadii waxaa laysku afgartay in si dhab ah loo wajaho wax u qabashada dadkaas tabaalaysan iskaashi dhab ahna ay uga wada yeeshaan labada dhinac iyadoo wax badan layska weydiiyey sidii loogu heli lahaa xal waara barakacayaasha ka soo qulqulaya Gobolada koonfurta & Bartamaha Soomaaliya waxaana ugu danbeyntii loo balamay kulan danbe.

Wasaaradda Arrimaha Gudaha Puntland