

Waxaa maalintii labaad socda shirkii heerka wasiiro ee African Union oo ka socda xarunta AU ee magaalada Addis Ababa.
Ra’iisul Wasaare Ku xigeenka ahna Wasiirka Arrimaha Dibedda ee Somalia Mudane Mohamed Abdullahi Omaar iyo wafdigii la socday oo ay ka mid ahaayeen La Taliyaha (Senior Advisor) ee Ra’iisul Wasaaraha Somalia Mudane Abdirahman Omar Osman (Eng. Yarisow) ayaa waxey labdii casho ee 27ka iyo 28ka Janaayo la qaateen kulamo gaar gaar ah qaar ka mid ah mas’uuliyiinta ka soo qeybgashay shirka kuwaas oo ay ka mid ahaayeen:
Wasiiru Dowlaha Arrimaha Dibedda ee Dalka Japan, Wasiirka Arrimaha Dibedda ee Australia, Ku Xigeenka Guddoomiyaha AU, Wasiirka Arrimaha Dibedda Pakistan, Wasiirka Arrimaha Dibedda Gabon, Wasiirka Arrimaha Dibedda ahna ku xigeenka Ra’iisul Wasaaraha Ethiopia, Wasiirka Arrimaha Dibedda ee Finland.
Wasiirka Arrimaha Dibedda Somalia ayaa dhammaan kulammadii gooni gooniga ahaa ayaa waxuu ku siiyey warbixin xaaladda waddanka, horumarka Xukuumadda Cusub ay ka sameysey xaga amniga, dhaqaalaha iyo transitional tasks oo ay ku jirto dastuurka qabyada ah. Dhammaan mas’uuliyiintii la kulmay waxay wada sheegeen inay aad ula socdaan xaaladda dalka isla markaana ay daneynayaan inay wax ka geystaan howlaha xilliga kala guurka ah si dalka Somalia looga saaro xaaladda uu ku jiro.
Dhammaan mas’uuliyiintii lala kulmay waxey caddeeyeen in somalida laga rabo inay la yimaadaan dadaal iyo dardargelin sidii looga gudbi lahaa waqtigan kala guurka ah, iyagoo wada xaqiijiyey in caalamku uu caawin karo oo kaliya, laakin xalka rasmiga ah laga rabo Somalida. Wasiirka Arrimaha Dibedda ee Somalia ayaa u caddeeyey dhammaan mas’uuliyiintaas in Xukuumadda, Madaxweynaha iyo Baarlamaankaba ay ka wada shaqeynayaan sidii marxaladan kala guurka ah looga bixi lahaa si transparent ah oo keeni kara kalsooni TFI dhexdeeda iyo kalsooni siin kara shacabka soomaaliyeed. Waxuu sheegay in xaaladda dalka ay u baahantahay in caalamku ay gacan weyn ka geystaan sidii loola dagaali lahaa argagaxisada, si dalka nabad loogu soo celiyo.