Taliyaha Madxtooyada Oo Beeniyay In Askartii Ka Soo Jeeday Gobolka Sool La Eryay, Sheegayna In Isku Shaan Dhayn Lagu Sameeyay Ciidanka Madaxtooyada
Hargeysa, February 13, 2011 (Haatuf)- Taliyaha Ciidanla Ilaalada Madaxtooyada Gen. Faysal Kaamil Ciise ayaa beeniyay in Askartii ciidanka Madaxtooyada ee ka soo jeeday gobolka Sool dhamaantood la wada eryay, balse tilmaamay in ciidankiisa uu ku sameeyay isku shaandhayn iyo isku badal 32 Askari oo ka mid ahna loo badalay ciidamada Bilayska, halka kuwo cusubna lagu soo badalay, isagoo intaa ku daray in dacayado raqiis ah ay dadka qaarkii ka fidinayaan ilaalada Madaxtooyada, kana digay in arrimaha ciidanka la siyaasadeeyo farahana lagala baxo wixii ku saabsan isku badalka ciidankiisa.
Taliyaha ilaalada Madaxtooyada Faysal Kaamil Ciise waxa uu sidaasi ku sheegay mar aanu xalay khadka Telefoonka kula xidhiidhnay waxna kaga weydiinay wararka sheegaya in Askartii ka soo jeeday deegaanka Sool iyo Buuhoodle laga eryay Madaxtooyada, isagoo arrimahasi ka hadlayana, waxa uu yidhi “Wararkaasi waa been aan sal iyo raad toona lahayn, in ciidanka isku badal iyo isku shaandhayn lagu sameeyaana waa shaqada ciidanku leeyahay, isku shaan dhayn baanu ku samaynay ciidanka 32 Askari ayaa la badalay, Askariguna waa Askari qaran oo meeshii la doono ayaa loo badali karaa, ciidan gobolka Sool ka soo jeeda oo la eryayna ma jirto, waxan se kuu sheegayaa ciidankaa la badalay gobolada iyo degmooyinka dalka oo dhan bay ka soo wada jeedaan, lix Asari oo kaliya ayaana gobolkaasi ka soo jeeda, waxaan se kuu sheegayaa in dacaayad iyo boro gaando ay yihiin waxaa suuqyada lala wareegayo, mana haboona in la siyaasadeeyo hawlaha ciidamada khuseeya, umana dul qaadanayno in faro galin lagu soo sameeyo, waajibaadka iyo xilka saaran ciidamada, suurto galna maaha in ciidamada qaranka abtirsiimo iyo gobolo lagu kala qaybiyo, maadaama ay yihiin ciidan qaran”.
