Ra’ysal Wasaare Ku Xigeenka Kuwayt Oo Kulan La Yeeshay Weftigii Madaxweynaha Somaliland
April 28th, 2011
Kuwayt (Somaliland.Org)- Ra’iisul wasaare Ku Xigeenka ahna Wasiirka Arrimaha dibada ee dalka Kuwayt Dr. Maxamed Sabaax Al Salaam Al Sabaax, ayaa maanta xafiiskiisa ku qaabilay weftiga madaxweynaha Somaliland Md. Axmed Maxamed Maxamuud (Siilaanyo ) oo socdaal shaqo ku jooga dalkaasi.
Madaxweynaha iyo Ra’iisul wasaare ku xigeenka dalka Kuwayt waxay ka wada hadleen arrimo badan oo ay ka mid yihiin sidii labada dal ay u yeelan lahaayeen iskaashi balaadhan.
Sida lagu sheegay war saxaafadeed madaxtooyadda Somaliland ay caawa ka soo saartay kulankaasi waxa kale oo Madaxweynaha iyo weftigiisu ay isla maanta kulan la yeesheen madaxa Ha’yada kaalmooyinka ee dalka Kuwayt ee (Kuwait fund) waxaana war murtiyeedka madaxtooyaddu ka soo saartay kulamadaasi uu u dhignaa sidan:-
“Ra’iisal Wasaare Ku xigeenka Dawladda Kuwayt ahna Wasiirka Arrimaha Dibedda Sheekh Dr. Maxamed Sabaax Al Salaam Al Sabaax ayaa maanta xafiiskiisa ku qaabilay Madaxweynaha JSL Mudane, Axmed Maxamed Siilaanyo iyo weftigiisa.
Wasiirka Arrimaha Dibedda Kuwayt waxa uu sheegay in ay dawladdiisu aad u soo dhawaynayso wax wada qabsiga iyo xidhiidhka sokeeye ee u dhexeeya labada waddan.
Wasiirka waxa uu sheegay in ay xukuumadiisu diyaar u tahay in ay Somaliland ku dhiirigeliso dedaalka ay ugu jirto horumarka ay ka samaysay dhinac nabadgelyada iyo maamulka ka hanaqaaday. Wasiirku waxa uu sheegay warwarka ay beesha caalamku ka qabto nabadgelyada madaqadda oo budhcad badeedu ku jirto.
Madaxweynaha JSL Mudane, Axmed Maxamed Siilaanyo ayaa ka waramay xaaladda guud ee siyaasadeed ee mandaqadda oo dhan iyo waliba kaalinta ay Somaliland ku leedahay nabadgelyada.
Madaxweynuhu waxa uu si mugleh uga waramay isbedeladii siyaasadeed ee geeska iyo heerarkii ay soo martay dhismaha dawladnimada Somaliland iyo waliba sida ay nabadgelyada Somaliland u tahay mid gunta ka soo dhisantay oo haatan adkaatay. Madaxweynuhu waxa uu ka waramay baahida ay Somaliland ka qabto gacan qabashada beesha caalamka gaarahaana dawladda Kuwayt. Waxaana uu uga mahadnaqay mashaariicda ay dawladda Kuwayt haatanba ka wado Somaliland sida garoomada dayuuradaha iyo cisbitaalada. Wuxuu se sheegay in ay baahida Somaliland intaa ka badantahay sidaasi si la mid ahna uga mahadnaqi doono mashaariicda horumarineed ee ay dawladda Kuwayt ku deeqdo.Waxaanu u gudbiyey mashaariic isugu jirta dhinaca biyaha iyo wadooyinka.
Isla maanta waxa Madaxweynaha iyo weftigiisa qaabilay sarkaalka ugu sareeya Hay’adda Kuwayt Fund iyo masuul kale oo ka tirsan Hay’addas. Sidoo kale, Madaxweynaha iyo weftigiisu waxa ay hay’adda kala hadleen in ay kordhiso mashaariicda horumarineed ee ay haatanba ka wado Somaliland. Waxaanay Madaxda Hay’adu sheegeen in ay dhinacooda diyaar u yihiin.
Shalayna weftiga Madaxweynaha waxa lagu casuumay beerta Amiirka oo lagu sameeyey qado sharaf iyada oo dayuurad nooca loo yaqaano Helikobtarta ah lagaga qaaday hooteelka uu daganyahay Madaxweynuhu.”
