Gudoomiyaha degmada Caabudwaaq Sh. Xasan Cabdi Calas (Xasan Caabudwaaq) ayaa warbixin ka siiyay xubnaha waftigan xaalada bini’aadanimo ee deegaanada ay xarunta u tahay Caabudwaaq ee Balanbal, Dhabad, iyo Bangeele oo dhamaantood ay ka jirto amni iyo nabad galyo la’isku aamini karo, waxaana uu ugu baaqay inay ku yeeshaan xarumo ay dagaan si buu yiri samafalkiinu uu u gaaro dadka u baahan.
Xasan Caabudwaaq ayaa u sheegay madaxda sare ee ka socota Hay’adaha UN-ka in maamulka degmada uu diyaariyay dhul balaaran oo ay dagaan Hay’adaha samafalka si ay deegaanka xafiisyo ugu yeeshaan, waxaana uu balan qaaday amaanka iyo nabad galyada deegaanka.
Sidoo kale, taliyaha amniga guud ee maamulka Ahlusuna Sh. Cali Maxamed Xasan (Sh. Cali Dheere) ayaa sheegay inay damaanad qaadayaan amaanka iyo nabad galyada Hay’adaha ku shaqada leh samafalka dadka tabaalaysan ee deegaanka.
Waftiga ayaa soo booqday goobaha ay ku nool yihiin qoysaska barakacayaasha ah, waxayna u balan qaadeen wax tar deg deg ah inay u fidin doonaan dadkaasi oo ay shegeen inay yihiin kuwa mudan samafalka QM.
Waxaa kale oo uu waftigu sheegay inay indhahooda ku arkeen dad baahan o rafaadsan kuwaasi oo kasoo barakacay Soomaaliya iyo Itoobiya, waxayna qireen in aanay helin kaalmo wax tar leh dadkaasi, laakiin waqtiga dhow ay isbadal dareemi doonaan. Ugu danbayntii, waxaa ay aad u amaaneen nabad galyada iyo jawiga guud ee degaanka waxaana ay sheegeen inay soo degayaan degmada si ay ula socdaan xaalada nololeed ee baahanayaasha deegaanka.
