18/05/11-Borama-(Bnn) Munaasabada Sanadguurada Labaatanaad Ee Qaranamida Somaliland Ayaa Maanta Si wayn Looga Xusay Gabi ahaan Magaalada Borama, waxaana ka soo qayb galay Bulshada Rayidka Noocyadeeda kala duwan, Ardayda, Macallimiinta, Shaqaalaha Dawlada, Haween, Dhalinyaro ,Caruur Iyo Waftigii Balaadhnaa Ee Uu Hogaaminayay Wasiirka Beeraha Somaliland Ee Ay Wehelinayeen Marwada Labaad Ee Jamhuuriyada Somaliland Marwo Raxma X/Muxumad Suldaan, La taliyaha Dhinaca Haweenka Madaxwaynaha Amaal Axmed Miisaan, Xildhibaano ka kala socday Golaha Wakiilada , Baarlamaanka Iyo Deegaanka,Mas'uuliyiinta Gobolka Iyo Kan degmada, Salaadiin, Cuqaal Indheer Garad, Aqoonyahano Iyo Marti shafaraf kale oo fara badan.
Munaasabadan oo ahayd Munaasabadii ugu waynayd ee Abid Ka dhacda Magaalada Borama, ayaa waxaa hadalo qiiro leh ka Soo jeediyay Mas'uuliyiinta ka kala socotay Qaranka , Gobolka Iyo Kan Degmada, waxaana ugu horeyn ka hadlay Maayorka Borama C/raxmaan Shide Bile waxa uuna sheegay in ay maanta tahay Maalin wayn uuna sheegay in ay u dabaal dagayaan Labaatan Guuradii ka soo wareegtay Qaranimada Somaliland Ee Aan Maanta hadhkiisa hoos hadhsanayno.
Sidoo kale waxaa isna halkaas ka hadlay Gudoomiyaha Gobolka Maxamed Daahir Cabdale, waxa uuna sheegay in ay maanta tahay Maalin wayn loona baahan yahay in laga wada qaybqaato dabaaldagyada Maalinta oo kale, waxa uuna ugu danbayn ku wareejiyay Hadalkii Madaxa waftiga Heer Qaran ee Xuska 18May ,Wasiirka Beeraha Somaliland , Prof:Faarax Cilmi Geedoole,waxa uuna u mahadnaqay ka soo qayb galayaashiii, ka dibna waxa uu salaan Siiyay uu u soo dhiibeen Madaxwayn Siilaanyo iyo M/Kuxigeenka Saylici,waxa uuna sheegay in Somaliland Tahay Mid Muqadash ah loona baahan yahay in aynu helno Ictiraaf dhab ah, waxa uuna si gaar ah u xusay Magaalada Borama oo uu sheegay in ay tahay Magaaladii lagu aasaasay Jamhuuriyada Somaliland, taas oo uu sheegay In Borama tahay Hooyadii Somaliland, loona wada Baahan yahay in laga wada qayb qaato Dhismaheeda, Ictiraaf Raadinteena, Halku dhiga sanadkana waxa uu sheegay in ay tahay Ictiraaf Raadin.
Si kastaba ha ahaatee Munaasabadii Xuska 18May oo Run ahaantii ahay mid aad u nidaamsan , dadwayne fara badana ka soo qayb galay ahayd, ayaa waxa ay ku dhamaatay Jawi Degan Oo Farxada.
