GAROOWE : Puntland oo qorshaynaysa in kaalmo dhaqaale u dirto dadka abaartu saamaysay ee Koonfurta Soomaaliya
Garoowe:- Kadib marki M-waynaha Puntland uu ku dhawaaqay in Dawladda Puntland ay kaalmo ballaaran gaarsiin doonto ayaa waxaa jira qorshe ay Dawladdu ku doonayso in ay ka arinsato kadib marka Guddi loo saaro sidii kaalmada loo gaarsiin lahaa dadka tabaalaysan ee ku nool Muqdhisho iyo gobolada kale ee dalka.
M-wayne Faroole, ayaa xuska 1-da Augst ee sanad-guurada 13-aad ee Puntland ka sheegay in ay Guddi farsamo u magacaabayaan sidii kaalmo loo gaarsiin lahaa dadka dhibaataysan ee ku nool Koonfurta Dalka, wuxuuna shacabka ugu baaqay in ay ka qayb-qaataan caawinta dadkan oo ay waajib tahay in la kaalmeeyo.
Dadwaynaha ku dhaqan Puntland ayaa muddooyinkan waxay wadaan dhaqaale uruuris ballaaran iyadoo Idaacadaha maxaliga ah ay Culimaddu dadka kaga uruurinayaan lacag taas oo la doonayo in gaarsiiyo dadkan tabaalaysan.
Goor hore ayay ahayd markii Puntland ay ku dhawaaqday in ay kaalmo dhaqaale u dirayso dadka abaaruhu ku waxyeeleeyeen Koonfurta hase ahatee wali ma jirto wax jawaab ah oo Puntland ka gaaray dadka tabaalaysan.
Dadka soo barakacay ee abaaruhu la darseen ee badankoodu soo gaareen Muqdhisho kuwo kalana ay deegaamadoodii ay ku dhibaataysan yihiin gaar ahaan gobolada Bay iyo Bakool ayaa waxaa abaarta u dheer cuduro, hoy la’ aan, waxaana qoysas badani waayeen caruurtoodii oo dhan qaar kalana waxa ay waayeen qayb ka mid ah caruurtoodii kadib markii ay jid dheer soo mareen.
