Gaalkacyo (RBC Radio):- Gudoomiyaha cusub ee gobolka Mudug Mudane Maxamed Yuusuf Jaamac (Tigey) ayaa waxaa uu faah faahin ka bixiyay tallaabooyinka laga sugayo in maamulkiisa cusub uu ka qabto gobolka Mudug.
Mudane Maxamed Yuusuf ayaa sheegay in uu xooga saari doono arimaha amaanka iyo nabadgelyada gobolka Mudug, wuxuuna intaa ku daray in uu arintaasi iskaashi kala yeelan doono dhinacyada ay khuseyso.
Gudoomiyaha waxaa uu soo hadal qaaday wada noolaanshaha dadka reer Puntland ee gobolka Mudug iyo dadka ka yimid koonfurta Soomaaliya, isagoo arimahaasi ka hadlayana wuxuu yiri ” Waxaan dhisi doonaa Guddi ay leeyihiin dadka ka yimid koonfurta Soomaaliya ee jooga gobolka Mudug, waxaana arintaasi aan uga gol leenahay in ay naga nabad galaan annaguna aan ka nabadgalno isla markaana nabad lagu wada noolaado”.
Mudane Tigey wuxuu sidoo kale sheegay in uu xoojin doono wada shaqeynta maamulka Galmudug si meesha ay uga baxdo dhibaatooyinka amniga la xiriira ee mararka qaar dhaca wuxuuna sheegay si dadku u kala nabadgalo oo nabadgelyo iyo xasilooni loogu wada noolaado in ay ka shaqeyn doonaan.
Gudoomiyaha cusub ee gobolka Mudug Mudane Maxamed Yuusuf Jaamac (Tigey) wuxuu hadalkiisa raaciyay in uu ka fogaan doono wax kasta oo keeni kara isku dhaca iyo isfaham darro dhexmarta mas’uuliyiinta gobolka Mudug.
Maamulka cusub ee Gudoomiye Maxamed ayaa ku soo beegmaya xilli amaanka Gaalkacyo ay wax iska badaleen maalmihii ugu dambeeyay waxaana laga filayaa in maamulkani cusub uu wax ka badal dhinaca amniga ah in uu la yimaado.
Cawil Maxamuud Cabdi
Cawil@raxanreeb.com
RBC Radio.
