Khilaaf soo dhexgalay ciidamada dowladda ee ku sugan Dhoobley iyo Al-shabaab oo duulaan ku ah degmadaas
Isniin, Ogoosto 29, 2011 (HOL) - Warar lagu kalsoon yahay oo ay HOL ka heshay gobollada Jubbooyinka iyo Gedo ayaa sheegaya inuu jiro khilaaf xooggan oo soo dhexgalay saraakiisha ciidamada dowladda KMG ah ee ku sugan degmad Dhoobley ee gobolka Jubbada hoose, iyadoo ciidammo Itoobiyaan ahna ay dhaqdhaqaaqyo ka bilaabeen gobolka Gedo.
Xarakada Al-shabaab ayaa iyaduna ciidamo fara badan geysay gobollada Gedo iyo Jubbada hoose si ay isugu daydo inay dib u qabsato degmooyinkii looga qabsaday dagaalladii horraantii sannadkan ka dhacay gobolladaas.
Wararku waxay intaas ku darayaan in Col. Cabbaas oo ka mid ahaa saraakiisha hoggaaminaya ciidamada DKMG ah ee ku sugan degmada Dhoobley uu ciidankiisii kala baxay degmadaas isagoo u jiheystay degmada Ceelwaaq ee gobolka Gedo.
"Ciidamada DKMG ah ee ku sugan Dhoobley waxaa soo dhexgalay khilaaf ba'an, taas ayaana keentay in saraakiil ka tirsan hoggaanka ay bilaabaan inay ciidankooda kala baxaan degmadaas," ayuu HOL u sheegay sarkaal ku sugan Dhoobley oo diiday in magac ahaan iyo darajo ahaan la xuso.
Sarkaalkan wuxuu sheegay in ciidamadu ay hab beeleed u kala furfurteen ayna ku sugan yihiin deegaanka ciidamadii kasoo jeeday deegaanada Jubbada hoose, iyadoo aanay dowladdu qaadin tallaabo ay ku xalinayso khilaafkaas.
Dhanka kale, ciidammo Itoobiyaan ayaa ka billaabay degmooyinka Gobolka Gedo ee ay gacanta ku hayso DKMG ah dhaqdhqaaqyo ciidan, iyadoo ciidamada dowladda la bilaabay in loo kala wareejiyo degmooyinka ay kaga sugan yihiin gobolkaas.
Lama yaqaan sababta keentay in dowlada Itoobiya ay dhaqdhaqaaqyo ka bilowdo gobolka Gedo, inkastoo uu dhawaan sheegay ra'iisul wasaaraha Itoobiya, Meles Zenawi inay awoodi karaan inay gargaarka geeyaan goobaha ay Xarakada Al-shabaab ka taliso si loo baajiyo inay dadka ku nool deegaannadaas u dhintaan macluul.
Dagaalyahannada Al-shabaab ayaa iyaguna ku qulqulaya labada gobol ee Gedo iyo Jubbada hoose, iyagoo doonaya inay qaab awoodeed ku qabsadaan degmooyinkii horraantii sannadkan laga fara marjoojiyay.
Goobjoogayaal ku sugan gobolladaas oo ka cudur-daartay inaan magacyadooda ku sheegno warbixintan ayaa sheegay in ciidammo hubeysan oo Al-shabaab ka tirsan ay buuxiyeen gobolladaas, kuwaasoo isku diyaarinaya inay weeraraan degmooyinka ay ku sugan yihiin ciidamada DKMG ah.
Dowlada Soomaaliya oo kaashanaysa ciidammo Itoobiyaan ah iyo Ahlusunna ayaa si awood ah kaga qabsatay Xarakada Al-shabaab afar degmo oo ka tirsan gobolka Gedo iyo degmada Dhoobley ee gobolka Jubbada hoose.
Ma jiraan hadal kasoo baxay dhinaca dowladda KMG ah oo ku saabsan khilaafka soo dhexgalay saraakiisha ciidamada taabacsan ee ku sugan degmada Dhoobley iyo dhaqdhaqaaqa ay ciidamada Itoobiya ka billaabeen gobolka Gedo.
Maxamed Xaaji Xuseen, Hiiraan Online
maxuseen@hiiraan.com
Muqdisho, Soomaaliya
